ÎZMÎR - Endama Meclîsê Pêroyî ya HDKyî Ayşe Ozdamar qetî kerde ke azadîya Rayberê Şarê Kurdî Abdullah Ocalanî “nîşaneyêko sembolîk û sîyasî yê azadîya şarê kurdî yo” û va: “Heta no proses nêbo waştişê têhet ê şarî, tu qanûn bi sereyê xo nêvejîyeno meydan.”

 

Her ke qebûlkerdişê Rayberê Şarê Kurdî Abdullah Ocalanî sey muhatabê sereyîn nê prosesî de raya pêroyî de zêde beno, munaqeşeyê derheqê helwestê muxalefetî yê Îmralî, bi taybetî yê CHP zî zêde benê. Her ke eşkera beno ke pawitişê azadîya fizîkî ya Rayberê Şarê Kurdî Abdullah Ocalanî tenya semedê ameyoxê şarê kurdî nê, la semedê heme komeleyê Tirkîya gamêka krîtîk a, sewbîna qetî beno ke waştişê aştîye ganî platformêko sîyasî ser o bêro komelkerdiş.

 

Endama Meclîsê Pêroyî ya Kongreya Demokratîk a Şaran (HDK) Ayşe Ozdamar, dîyar kerde ke aştî tenya bi qasê ke bibo komelî eşkena aver şoro û va: “Tu aktorêko sîyasî bi sereyê xo nêeşkeno nê prosesî bîyaro ca; aştî tenya demo ke komel bi tewrîbîyayîşêko hîra aye bikero verike xo mumkîn o.”

 

‘Ma ganî şar qezenc bikerê, ne ke ma înan meydan ra wedarnê’

 

Ayşe Ozdamar qetî kerde ke heme komel bi aştîye hewce yo û ganî heme parçeyê komelî bi temamî tewrê prosesê aştîye bibê û va: “Werrekna CHP’yî nê peyîn de qerarê nêşîyayîşê Îmraliyî nêdayîne. Semedo ke ewro CHP çarçeweya prensîbanê xo de hemverê AKPyî têkoşînê demokrasî domneno. No bi rastî semedê şarê Tirkîya têkoşînê zaf qîmetdar o. No çîyêko ke ganî bêro naskerdene yo. Yewbîyayîş bi nê têkoşînî, hevalkarîya bi ci û bi têhet domnayîşê semedê heme şaran, semedê ameyoxê Tirkîya zaf baş bî. Semedê nê werrekna qerarêk winî nêdayîne, labelê peynîye de ez nêwazena zaf qalê ci bikerî. Semedo ke ma û ê kesê ke xo mesûl hîs kenê ganî hewl bidê ke tewrîbîyayîşê heme komelî nê prosesî de bîyarê ca. Bi vatişêk bîn, vera ke ma înan meydan ra wedarnê û marjînal bikerê, ganî ma hewl bidê ke şar qezenc bikerê.”

 

‘Azadîya Abdullah Ocalanî azadîya şarê kurdî ya’

 

Ayşe Ozdamar dîyar kerde ke aye bawer kena ke şîyayîşê Komîsyonê Piştdayîşê Neteweyî, Wayê-Bira Demokrasî yê Îmrali destpêkêk o û muhîmîyê tewrîbîyayîşê hîrayêr nê şîyayîşan de qetî kerd. Ayşe Ozdamar dîyar kerde ke aye terefgira nê ya ke tenya partîyê sîyasî nê, la eynî wextî de rêxistinê girseyî yê demokratîk û sendîka zî şêrê Îmrali yan bi hawayêko bîn Rayberê Şarê Kurdî Abdullah Ocalanî dir pêvînayîş bikerê û va: “Heme kes, hetanî Devlet Bahçelî zî, nika qebûl keno ke Birêz Abdullah Ocalan Rayberê Şarê Kurdî yo. Azadîya şarî bi azadîya rayberê xo ra eynî mana ya. Na çarçewa de waştişê şarê kurdî yê derheqê na mesela de çi bingehê heqê hêvîye ser bibo yan çarçeweya wina yê qanûnî de bibo goreyê mi zaf muhîm û manadar o. Her halî de azadîya Abdullah Ocalanî muhîm a semedo ke azadîya şarî ya.”

 

‘Abdullah Ocalanî berêk semedê prosesî akerd!’

 

Ayşe Ozdamar qetî kerd ke azadîya Rayberê Şarê Kurdî Abdullah Ocalanî semedê prosesî zaf muhîm a û va: “Semedê nê eke ma nê perspektîfê şarê kurdî dir biercnê, rewşe wina ya. Eke ma qalê aştîya ke ganî bibo kenê, eke ma tîya qalê têduştîya şaran kenê, eke ma qalê cuya şarê kurdî yê têduşt û azad nê erdan ser o kenê, eke ma qalê cuya heme şaranê bitêhet û azad kenê, ma nêeşkenê serê nê şarî tira bikerê û bidê hetêk. No mumkîn nîyo. Çarçeweya qanûnî ya na mesela teknîkî ya, labelê bingehê aye na ya. Bi kilmî ez wazena wina vajî. Abdullah Ocalanî berêk semedê nê prosesî akerd. Nika mesûlîyetê gird ê şarê kurdî, şarê tirkî, karkeran û cinîyan o ke nê berî ra derbas bibê. Eke no wezîfe nêro ca, ez bi temamî bawer nêkena ke hîn qanûnî ma rê bêrê dayene.”

 

‘Ganî heme şar têhet kom bibo’

 

Ayşe Ozdamar dîyar kerd ke wareyê şerî hîna zêdeyêr vila beno û va: “Nika Deryayê Sîya de bomba teqîyenê. Ma mîyanê kaosî de yê. Rayîro tenya yê ma ke nê herêmî de vinderê û nê kaosî, na rewşa şerî ra vejê no yo ke heme şarî têhet de kom bibê û semedê demokrasî, azadî û aştîye têkoşînê yewî bidê.”