Melek Avci

 

ANQARA – Avûkata Eva Schonveld ke verê heyetê tecrîdê mîyanneteweyî de ca girewtêne, bale ant heqê hêvîye ser û wina va: “Şansê Erdoganî babeta çareserîya problemê kurdî de, tewrbîyayîşê aktîf ê Birêz Abdullah Ocalanî yê muzakereyan de yo.”

 

Venga “Aştî û Komelêko Demokratîkî” yê Rayberê Şarê Kurdî dir prosesêko tarîxî û krîtîk ê demokratîkbîyayîşê Tirkîya û çareserîya problemê kurdî dest pêkerd. La pêwa ke nêzdîyê serrêke ra zêde prosesî ser derbas bîyo zî, hîna gamê sîyasî yê ke ganî bêrê eştiş nêameyî eştiş yan zî bi lez ke yeno pawitiş aver nêşîyo. Dimayê serdanê komîteyî yê Îmrali, taloqkerdişê kombîyayîşê komîteyî, prosesê huqûqî yê lazimî nêkewtê rojeve û yê tewr muhîm zî hema heqê hêvîye mumkin nêbîyo.

 

Avûkata Eva Schonveld ke verê heyetê tecrîdê mîyanneteweyî de ca girewtêne, serdayîşê Tirkîya kerdebî û semedê pêvînayîşî muracatê Wezaretê Edaletî kerdebî, derheqê heqê hêvîye û prosesê huqûqî de qisey kerde.

 

Eva Schonveld da zanayîş ke Abdullah Ocalan pêwa heme sîyasetanê zordarîya dewlete zî, serran o lîderek o ke azadîya kolektîf esas gêno û wina ard ziwan: “Azadîya Abdullah Ocalanî wayîrê muhîmîyêko merkezî yo. Bi desine rey ame vatene: Ocalan azad nêbo kesê bînî zî azad nêbenê. Bi nê zî sey lîderekê muhîm û jîr,  binpaykerdişê bêmerdimayî dir rî bi rî ameyo zî piştîdayîş dayo aştî. Semedê nê zî nêzdîbîyayîşê vurnayîşê demokratîkî hetê azadîya ey de muhîm o.”

 

‘DMME tespît kerde ke no binpaykerdiş o’

 

Eva Schonveld da zanayîş ke bi qerarê Komîteya Wezîran û DMME’yî ame tespîtkerdiş ke nêmumkinbîyayîşê heqê hêvîye binpaykerdiş o û nê çîyan ard ziwan: “Ma verê heme çîyan vanê ke ganî heqê hêvîye semedê Birêz Ocalan û heme tepiştîyan mumkin bibo. Dadgeha Heqanê Merdiman ê Ewropa tespît kerde ke heqê hêvîye semedê Abdullah Ocalan mumkin nêbîyo û na babete de binpaykerdişê heqan tespît kerd. Komîteya Wezîran dewa newe ra girewte dest û tarîxê peyênî sey hezîrana 2026ine dîyar kerd û Tirkîya rê dem da. Çi heyf heta nika gamêke nêame eştiş.”

 

‘Problemê esas ê verê komîteyî nêmumkinbîyayîş o’

 

Eva Schonveld dîyar kerde ke Tirkîya proseso ke ame mojnayene de gam nêeşta û nê çîyan va: “Komîte demê peyênan de çend kombîyayîşan kerd û qerar girewt. Qeraran de Tirkîya na babete de kerd binê zordarîye. La hukmatê Tirkîya derheqê heqê hêvîye de hema tu game nêeşta. Nêbîyayîş zî verê Komîteya Wezîran de problemo esas o.”

 

‘Eşkerayîya Birêz Ocalanî muhîm a’

 

Eva Schonveld wina domnaye: “Tirkîya serranê 2000ine de prosesê endamîya YE’yî de rayîr akerdebî la bi qel qelsbîyayîşê têkilîyan no zî qels bi. Eşkerayîye Birêz Ocalanî yê demê peyênan bêguman muhîm bî. No nêzdîyê serrêk o ke prosesêk domneno. PKK gamê muhîmî eştî. La îqtîdar hema hemverê nê gaman nîyetêk baş nêmojna. Eke tavîzê beramberê yewbînan çin bê, ganî bêro zanayene ke no wina nêeşkeno bidomîyo.”

 

‘Rolê aktîf ê Birêz Ocalanî semedê Tirkîya îmkanêko gird o’

 

Eva Schonveld dîyar kerd ke muzakereyan de tewrbîyayîşê Abdullah Ocalanî semedê Tirkîya îmkanêko gird o û wina peynî ard: “Şansê Erdoganî babeta çareserîya problemê kurdî de, tewrîbîyayîşê aktîf ê Birêz Abdullah Ocalanî muzakereyan de yo. Bi nê hawayî hukmatê Tirkîya do îmkanêko aştî û azadîye bivîno.”