Pelşîn Çetînkaya

 

AMED - Parlamentera Partîya DEMî ya Mêrdînî Berîtan Guneş da zanayîş ke pêvînayîşê heyeto ke 3 kesî ke mîyanê komîsyonî de ca gênê, pê yeno, yê Rayberê Şarê Kurdî Abdullah Ocalanî dir zaf muhîm o û va ganî meclîs bi problemê kurdî û problemê bînan ê komelî dir bê ro rî bi rî. Berîtan Guneş ard ziwan ke gamê nê rengî do hêvîya çareserîye bidê şarî.

 

Komîsyonê Demokrasî, Wayê-Biratî û Piştîdayîşê Neteweyî ke Meclîs de ame awankerdiş, kombîyayîşê xo yê yewine yê 5ê tebaxe 2025î ra hetanî nika 18 rey kombî û semedê beşê eleqedaran xebatê goşdarîkerdişî pê ardî. Kombîyayîşê xo yê 18ine ke 21ê teşrîna peyêne 2025ine de ame kerdiş, bi xeylê reyan qerar ame dayîş ke Abdullah Ocalan Zîndanê Asayîşê Berzî yê Îmrali de bêro goşdarîkerdiş. Goreyê nê qerarî, 24ê teşrîna peyêne 2025ine de heyet şi Zîndanê Berzî yê Îmralî. Serekîya Meclîsî piştrast kerd ke serdayîş bîyo û va: “Netîceyê pêvînayîşî de semedê piştîdayîşê komelî, awankerdişê wayê-biratî û bi hawayêko pozîtîf domnayîşê prosesî netîceyêk pozîtîf bi.”

 

Parlamentera Partîya DEMî ya Mêrdînî Berîtan Guneş pêvînayîşa ke ameyî kerdiş ercna û da zanayîş ke ganî pêvînayîşê Abdullah Ocalan dir bêmabêne bêrê kerdiş.

 

Têkoşîno ke bi serran ameyo dayîş hetanî ewro…

 

Berîtan Guneş da zanayîş ke waştişê aştî û demokrasî netîceya cigêrayîşê se serran o û va: “No waştişêko 100 serrî yo. Şarê kurdî, şarê ke Anatolya û Mezopotamya de ciwîyenê nê babetî anê ziwan. Ewro ma nê prosesî qisey kenê û netîceyê waştişê bi israr o.”

 

‘Hin partî sîyasetê bêçareserîye domnenê’

 

Berîtan Guneş dîyar kerd semedo ke bi serran cewabê venga Rayberê Şarê Kurdî Abdullah Ocalanî yê semedê çareserî û diyalogî nêame dayîş problem kûr bîyo û wina derg kerd: “93ine ra hetanî nika Birêz Ocalan vano ‘Ez muhatabê xo gêrena’ û cigêrayîşê çareserîye de bi. La çi heyf nêwaştî nê waştişê aştîye bivînê, cewab nêdayî muxatabîye, problemê kurdî înkar kerdî û bêçareserîye de israr kerdî. La ewro her çiqas no problem bêro înkarkerdiş zî bi heme rastîya xo muxataban gêreno. Bêguman hîn partî sîyasetê bêçareserîye de israr kenê.”

 

‘Mumkin nîyo ke pişta xo bidê paradîgmaya Birêz Ocalanî’

 

Berîtan Guneş da zanayîş ke waştişê şarî yê aştîye nêeşkeno bêrê nêdîyayîş û wina domnaye: “Ganî sîyaset nê vengî bieşnawo. Şansê îqtîdar û meclîsî nêmend ke êdî waştişan nêeşnawo. Ma averşîyayîşê Rojhelatê Mîyanên û dinya de biewnê, ganî no sîyaseto bîyaye bivurnê. Pêvînayîşê Îmrali prosesê aştî û komelê demokratîkî de nuqteyêk tarîxî yo. Heyetêk yê komîsyonî ke hîrê kesan pê yeno, şî. No heme komîsyonî temsîl keno. Heme partî ganî goş bidê paradîgmaya Birêz Ocalanî. Nêgirewtişê fikrê Birêz Ocalanî de israrkerdiş manaya bêçareserîye de israrkerdiş o. Pêvînayîşê Birêz Ocalan dir manaya qedênayîşê înkarkerdişê 100 serrî û destpêkerdişê diyalogî yo. Rûhê demî dîyalog o. Çareserî bi dîyalog mumkîn o. Meclîs nê hetî de hêzê çareserîye de vet werte û hêvî da şarî. Meclîs, hetê çareserîya problemê kurdî de îradeyê çareserîye vet werte. Dîyalog hêvîya çareserî dano şarî.