ANQARA – Ciwanê ke Herêma Federe ya Kurdistanî ra ameyî Anqara û meclîsê ciwanan ê Partîya DEMî semedo ke Rayberê Şarê Kurdî Abdullah Ocalan dir pêvînayîş bikerê, muracatê Wezaretê Edaletî kerdî.

 

Ciwanê endamê Partîya Komunîst ê Kurdistanî (KCP) û Partîya Sosyalîst ê Kurdistanî (PASOK) Herêma Federe ya Kurdistanî ra ameyî Anqara. Ciwanê Başûrî, verê endamê meclîsê ciwanan ê Partîya Têduştî û Demokrasîyê Şaran (Partîya DEM) dir, semedo ke şêrê Girawa Îmrali û Rayberê Şarê Kurdî Abdullah Ocalan dir pêvînayîş bikerê, muracatê Wezaretê Edaletî dayî. Ciwanê ke vernîya serdanê Wezaretê Edaletî kerd, Merkezê Pêroyî yê Partîya DEMî, parlamentera Şirnexî Newroz Uysal Aslan dir pêvînayîş kerd. Dimayê pêvînayîşî ciwanî şîyî verê Wezaretê Edaletî û waştişnameyê semedê pêvînayîşê Rayberê Şarê Kurdî Abdullah Ocalan dir pêşkêşê Wezaretê Edaletî kerdî.

 

Ciwanî, derheqê muracatî de verê Wezaretê Edaletî de eşkerayîye dayî. Parlamentera Partîya DEMî ya Şirnexî Newroz Uysal Aslan zî tewrî eşkerayîye bî.

 

Destpêk de endamê meclîsê ciwanan ê Partîya DEMî Rêzan Kâaganarslan qisey kerd û dîyar kerd ke sey Ciwanê Demokratîk demêko derg o xebatê înan est ê û va: “Heyetê ciwanan ê Başûrê Kurdistanî ame Mêrdîn, tewrê panelê Yewîya Neteweyî bî. Dima ra şî Riha û nika zî Anqara de do semedo ke şêrê Îmrali, waştişname bidê Wezaretê Edaletî. Sey Ciwanê Demokratîk demêko derg o xebatê ma dewam kenê.”

 

‘Ma wazenê Rayber Ocalan azad bo’

 

Partîya Zahmetkeşê Kurdistanî Shko Şhwan zî va ke înan semedê piştîdayîşê prosesê aştîye ameyê û va: “Ma semedê ke piştîdayîş bidê prosesê aştî û rewşa Rayber Ocalanî bimusê û piştîdayîşê şarê Başûrî bimojnê, wazenê şêrê Girawa Îmrali û Rayber Ocalanî dir pêvînayîş bikerê. Ma wazenê Rayber Ocalan azad bo.”

 

‘Şarê kurdî miletêk aştî wazeno yo’

 

Partîya Sosyalîstî ya Demokratî ya Kurdistanî Salar Abdurrahman zî destnîşan kerd ke miletê kurdî miletêk aştî wazenê yê o û wina qisey kerd: “Ma tîya de çend serdayîşî kerdî. Bi nê serdayîşan ma wazenê bimojnê ke şarê kurdî miletêk aştî wazeno yo. Ma wazenê Rayber Ocalanî dir pêvînayîş bikerê û piştîdayîşê prosesê aştîye bikerê. Ma wazenê welatê ma zî azad bo û heme kesî bi azadî mîyanê aştîye de pîya biciwîyê.”

 

Dimayê eşkerayîye heyetê ciwanan Newroz Uysal Aslan dir semedê pêvînayîşê Rayberê Şarê Kurdî Abdullah Ocalanî, waştişname dayî Wezaretê Edaletî.