ANQARA - Nebahat Çalpan dîyar kerd ke dejê tewr gird ê şerî cinî ancenê û eşkera kerd ke ganî cinî semedê nê bibê serkêşê aştîye. Neslî Çîftçî zî wina va: “Prosesê Aştî û Komelê Demokratîkî de ma do dorê perspektîfê ke serekê pêşnîyaz kerdo bêrê têhet û bibê kirdeyê aştîye.”

 

Rayberê Şarê Kurdî Abdullah Ocalan 27ê Sibate de vengdayîşê “Aştî û Komelê Demokratîkî” kerd û dimayê nê hêvîya aştîye ancî newe ra gird bî. Verfeka Meclîsê Cinîyan ê Partîya Têduştî û Demokrasîyê Şaran (DEM Partî) ya Anqarayî Nebahat Çalpan û Endama Meclîsê Ciwanan ê DEM Partî Neslî Çîftçî derheqê prosesî de qisey kerd û bale antî muhîmîya wayîrvejiyayîşê prosesî ser.

 

‘Ganî qisey û tecrubeyê cinîyan bibo’

 

Nebahat Çalpan dîyar kerd ke barê tewr gird ê şerî cinî ancenê û wina ard ziwan:

 

“Îqtîdarê camêrdan şer û wêrankerdiş vejeno meydan û dej û tesîrê ci zî cinî ancenê. Cinîyê ke tutan, keye û cuya xo pawênê, aştî semedê înan awankerdişê cuya rojane yo. Semedê ke cinî aştîye reya newe sey cuye awan kenê, proses de bixo zî ganî qisey û tecrubeyê înan bibo. Semedê ke cinî bi rastî bi formê edalet, komel û rîbîyayîşî dir girêdayeyê. Ganî cinî bibê serkêşê aştîye.”

 

‘Ma tecrubeyê Rojawanî zanê’

 

Nebahat Çalpan eşkera kerd ke aştî semedê cinîyan dîplomasî ra zêdeyêr a û wina bale ant etîkê aştîye ser û va: “Semedê nê etîkî rol û mîsyonê înan zî gird o. Ganî cinî prosesî de sey kirde ca bigîrê. Semedo ke aştîya ke cinî ci de çin bê qels û çin a. Sey ke ma şorişê Rojawanî zî zanê, ê ke aştîya mende awan kenê cinî yê. Ma nê tecrubeya Rojawanî ra zanê. Ma veng danê heme cinîyan. Aştîyêka ke cinî ci de çin bê aştî nîya û qels a. Ganî heme cinî bibê vengê nê vengdayîşî ma.”

 

‘Ma do dorê perspektîfî de bêrê têhet’

 

Neslî Çîftçî zî bale ant rewşa cinîyê ciwanan ê zanîngehan ser û va bêameyox û binê şertê ekonomî yê giranan de cuya xo dewam kenê û va: “Pêwa nê problemê nasnameyî, problemê ziwanê dayîke û xeylê çî bînî yenê ciwîyayîş. Ma do Prosesê Aştî û Komelê Demokratîkî de bibê kirde û dorê perspektîfê ke serekê pêşnîyaz kerdo bêrê têhet. Ma cinîyê ciwan semedê ameyox û cuya xo hewceyê aştîye vînenê. Ma wazenê bi ziwanê xo qisey bikerê. Ganî ma perspektîfê serekî sey hêvîye bivînê û wayîrê ci vejîyê. Ma cinî kirdeyê aştîye yê. Ganî ma aştîye bipawê.”