ŞIRNEX- Sîyasetmedar û aktîvîsta TJA’yî ya verê Bêrîvan Kutlu hetê bi hezaran hemrayanê xo û welatijan ra ameye oxirkerdene. TJA’yî Kutlu sey şehîda demokrasîyî îlan kerd.

 

Aktîvîstan Têgêrayîşê Cinîyanê Azad (TJA) û Hemşaredara Cizîrî ya verê Bêrîvan Kutlu ke vizêr beşê onkolojî yê Nêweşxaneyê Dewlete ya Balcaliya Edene de cuya xo vîndî kerdbî, serê sibayî hetê bi seyan welatijan ra Cizîr de ameye pêşwazîkerdene. Hemsereka DEM Partî ya Pêroyî Tulay Hatîmogullari reyde bi seyan kesî erebeya meytî reyde verê xo da dewa Navyanî ya girêdayeyê Şirnexî.

 

Demo ke meytê Bêrîvan Kutlu resa dewa Navyanî, tîya de bi hezaran cinî û welatijan ra ame pêşwazîkerdene. Cinîyan meytê Bêrîvan Kutlu ke bi renganê kesk û sor û zer amebi xemilnayene, ey girewt milanê xo ser o û heta goristanê dewe bi sloganê, ‘Jin jîyan azadî’ û ‘Şehîd namirin’ rayra şîyê. Dima ke meyt resa mîyanê goristanî, wecîbeyê dinî ameyê kerdene û cinîyan herre eşt mezelê Bêrîvan Kutlu ser.

 

Dima ke meyt ame definkerdene, Hemsereka DEM Partî ya Pêroyî Tulay Hatîmogullari vat Bêrîvan Kutlu seba azadîya şarê kurdî gedeyîye ra beşdarê xebatan bîya û wina vat: “Heta ke xeylaê Bêrîvan bêrê ca, xoverdayîşê ma do dewam bikero. A ala ke aye girewtbî, ma do her tim berz vindarnê, heta ke ma komelêko azad biafernê. Ma soz danê heme şehîdan ma do na herre ser o aştîya şaran bîyarê ca. Ma vanê sereyê şarê ma û keyeyî weş bo.”

 

Nameyê Têgêrayîşê Cinîyanê Azad (TJA) ser o Çîmen Fîdan da zanayene ke înan Bêrîvan Kutu sey şehîda demokrasî îlan kerda û wina vat: “Heval Bêrîvan kuçe bi kuçe, dewe bi dewe, şaristan bi şaristan seba azadîya şarê kurdî û cinîyanê kurd têkoşîn kerdene. Her tim vatêne heta azadîye nêra, vindertiş çin o ma rê. Ma sey Têgêrayîşê Cinîyanê Azad heval Bêrîvan şehîda demokrasî îlan kenê. Ma vanê sereyê şarî, şarê kurd, cinîyê kurd û Raybertîyî weş bo.”

 

Qiseyekerdişan ra pey cinîyan mezelê Bêrîvan Kutlu bi vilikan xemilna.

 

Dima girseyo ke beşdarê merasîmê cenazeyê Bêrîvan Kutlu bi, seba tezîye şi Silopya.