Melek Avci

 

ANQARA – Dîlan Kunt Ayan va ke eşkerayîya Têgêrayîşê Azadîya Kurdî yê 26ê teşrîna verêne gamêka muhîm a û va dewlet nê pakêtê hukmî otorîterî, ganî qanûnê entegrasyonê demokratîkî ke piştdayîşê na game dano bikero rojeva xo.

 

Têgêrayîşê Azadîya Kurdî 26ê teşrîna verêne de eşkerayî da û va dest bi antişê qewetanê xo Tirkîya ra kerd. Na game dinya û Kurdistanî de veng da û çimê şarî gamanê eşkerayan ê îqtîdarî de yo.

 

Dimayê qerarê antişî babeta ke tewr zaf ameye munaqeşekerdiş na ya ke îqtîdar cewabêk senîn do bido nê hemleyî. La 11ine pakêta hukmî ke vejîya, derheqê aştî û entegrasyonî de tu gamêk nîno dîyene û pêşnîyazîyêk ke heqan hîna pey vîneno vejîyeno werte. Reaksîyonî hemverê nê de dewam kenê.

 

Parlamentera DEM Partî Dîlan Kunt Ayan derheqê pakêtanê hukmî, qanûnê entegrasyonî de ercnayîş kerd. Dîlan Kunt Ayan bale ante ser eşkerayîya Têgêrayîşê Azadîya Kurdî yê 26ê teşrîna verêne û va: “Nê prosesî de eşkerayîyêk krîtîk ameye dayene. 11ine pakêta hukmî de derheqê ameyoxî de nê, qanûnê ke astengê çareserîya demokratîke ya meseleya kurdî kenê est ê. Ganî ma nê munaqeşe bikerê. Ganî ma qanûnê 11ine pakêta hukmî nê, ganî ma qanûnê entegrasyonê demokratîkî qisey bikerê. No hemleyêk ke vernîya prosesî akeno yo.”

 

‘Bi pakêtanê otorîter no aver nêşino’

 

Dîlan Kunt Ayan çalakîya veşnayîşê çekan ê PKK ard vîr û va eşkerayîya ke 26ê teşrîna verêne de ameya dayene zî eşkerayîyêk rêze ra nîya û va: “11ine pakêta hukmî, hema pêşnîyazîyêk ke ameya verê komîsyonî, şirawitişê endamanê komîsyonê edaletî û parlamenteran rê çin o. Bi destê Wezaretê Edaletî pakêtek ameya vilakerdiş û wexto ke ma ci rê ewnîyenê ke bi amancê şekildayîşê nê vejîyeno. Ma nê Wezaretê Edaletî rê vanê, goreyê eşkerayîya Têgêrayîşê Azadîya Kurdî yê 26ê teşrîna verêne ganî qanûnê goreyê nê bêrê qiseykerdiş. Bi pakêtanê wina otorîterî prosesê pozîtîfî nînê domnayîş.”

 

‘Ganî qanûnê prosesî awan bibê’

 

Dîlan Kunt Ayan wina dewam kerd: “Vengdayîşê 27ê sibate ra heta nika bendewarîyê şarî estbîy. Ma pakêta hukmî ewnîyenê, hemverê bendewarîyan o; pakêtek ke cezayan gird kenê, sûcê neweyan ê kategorîzekerdeyan vejîyenê werte, azadîya fikr û fehmî sînor kenê danê werte. Nê prosesî de bêguman no nêeşkeno bêro qebûlkerdiş. Ganî problemê kurdî bi rayanê demokratîkan bêro çareserkerdiş. Ganî qanûnî goreyê prosesî bêrê vetiş.”

 

‘Bendewarîya komelî esta la game çin a’

 

Dîlan Kunt Ayan dîyar kerd ke eke prosesêk bêro awankerdiş, ganî destpêkê gama ke bawerî dana komelî bêro eştene û wina dewam kerd: “Nê semedê ra zî ganî pakêtanê hukmî cewabê heme hetan bibê. Na bendewarî tenya kesê ke sîyasetê demokratîkî domnenê nîya, ya pêro komelî ya. Bendewarîya komelî est a la çi heyf game çin a. Ganî Wezaretê Edaletî lezkî goreyê eşkerayîya Têgêrayîşê Azadîya Kurdî yê 26ê teşrîna verêne qanûnan dana werte û meclîs de zî semedê nê xebate dest pêbikerê. Wextê vînîkerdişî çin o. Na gamêka xeylêk bi qîymet a. Ganî meclîs, Wezaretê Edaletî goreyê nê qanûnan bica bîyaro.”

 

‘Semedê qanûnan têkoşînêk topyekun lazim o’

 

Dîlan Kunt Ayan dewamê qiseykerdişş xo de bale ante ser persa ganî komel se bikero û na babete de zî wina va: “Bi serran o na dewlete tu çîyêk nêdaya şarê kurdî. Heme destkewtişî, kede û têkoşînê şarî ameyî girewtiş. 1ê teşrîna verêne 2024 ra prosesêk dewam keno. La ma ewnîyenê ke dewlete hetê eştişê game de xo peyser ancena. Êdî ganî tenya rexnekerdiş nêbo, ganî ma eynî wextî de xetêk têkoşînê topyekun vejê werte. Semedo ke qanûn derheqê prosesî de bêro vetiş no lazim o û şert o.”

 

Dîlan Kunt Ayan bale ante ser ‘entegrasyonê demokratîkî û qanûnan’ û wina ard ziwan: “Entegrasyono ke ma vanê helnayîşêk nîyo, vînîkerdiş nîyo. Eksê ci kesan, nasnameyan paweno. Cuyêka weş vejo werte. Nê prosesî de ganî TMK zî bêro wedaritiş. Yew qanûno bîn ê entegrasyonê demokratîkî heqê hêvîye yo. Semedo ke dewlete heqê hêvîye bica bîyaro tu astengî vernê de çin o. No zî senî mumkin o? Ganî ma xeta xo ya têkoşînî gird bikerê.”