MERKEZÊ XEBERAN – Koordînasyonê Kongra Starî eşkera kerd ke endama Koordînasyonê Kongra Starî Hêvî Silêman roja sêşeme semedê kanserî şehîd bîya.

 

Kongra Star eşkera kerd ke bi xemgînîyêk gird agahîya şehadetê Hêvî Silêman girewtê û ame vatiş: “Destpêk de ma vanê ke hevala Hêvî semedê şarê Rojawanî, semedê têkoşînê ma yê azadîya cinîyan, hem zî semedê şarê ma yê Efrîn-Helebî, vînîbîyayîşêk gird bî. Hevale Hêvî têkoşînê 30 serran zêdeyêr yê bêmabêne, bêvindertiş û bêteredut domna.”

 

Kongra Star dîyar kerd ke armanc û xeyalanê aye o bî ke rîyê dinya ser de cinîyêke bindest û bêorganîzekerde nêmano û wina dewam kerd: “Eynî wextî de semedê azadîya fîzîkî ya Rayberê ma, aye bi heme qawetê xo mîyanê têkoşînî de bîye. Heta semedê nê zî rasterast mîyanê komîteya azadîya fîzîkî ya Rayberî de ca girewte û bi serran o semedê nê têkoşîn kerd. Hevale Hêvî eynî wextî de verê Serok Apo de menda û perwerdeyê Serok Apo ra derbas bîya. Hevala Hêvî hetê kar û xebatanê semedê azadîya şarê xo, semedê azadîya Rayberê xo de, eynî wextî de kedkara keyeyî bî, dayîkêkê muqedes bî. Nê hetî ra zî aye semedê heme cinîyan mîsalêk rasterast bî.”

 

Eşkerayîya Kongra Starî wina dewam kerd: “Heme bêîmkanî, zor û zehmetîyan de hevale Hêvî bi netîce kar vet werte. Hem zî aye mamostaya ziwanê kurdkî bîye. Nê hetî ra zî hemraye Hêvî xeylêk tutan perwerde kerd û wezîfeyê welatparêzîyêk esasî bica ard. Hevala ma xozanakerdiş, cigêrayîşkerdiş, polîtîkayê fehmkerdişî de wayîrê hewldayîşî û berardişan bî, şexsêk roşnvîre bî. Xeylêk akademîyan de dersanê ke daya, bi seyan merdimî ameyê perwerdekerdiş.”

 

Kongra Star dîyar kerd ke Hêvî bi keda xo, bi kar û xebatanê xo, bi germîya xo, bi awankerdoxî ya xo her tim kede daya û ame vatiş: “Aye mîrasê cinîyê têkoşeran ê şarê Rojawanî, bi taybetî zî yê Efrînî pawena û heme şert û mercan de vindertişê xo ra anêgêra. Şehîd Hêvî serkêşîya heme cinîyanê Rojawanî, bi taybetî zî cinîyanê Efrînî kerd. Aye kulturê xoverdayîşê Efrîn-Şehbayî ra amebî. Aye tuta koçberîye bî û pêwa heme tewirê zor û zehmetîyê koçberî zî, pêwa heme dejanê welatê xo bi çimanê xo zî dî, aye her wextî ra hîna zêdeyêr xo bi hêz kerd û bi cewabdayîşê xurtkerdişê têkoşînî waşt heyfê xo dişminê xo ra bigîro. Şehîd Hêvî kulturê keyêk welatparêz û wayîrê şehîdan amebî. Keyeyê şehîd Hêvî ke semedê azadîye xeylêk berdêl dayê û heta roja ma ya nika zî bi kede, fedakarî û germîya xo yenê nasnayîş.”

 

Kongra Star peynî de eşkera kerd ke înan hevala xo sey ‘şehîda Kongra Starî’ îlan kenê û ame vatiş: “Ma têkoşînê şehîd Hêvî biresnê serkewtişî. Semedê ke ma xeyalanê hevala Hêvî bica bîyarê, ma bi heme qewetê xo kar û xebatanê xo girdêr bidomnê. Wa rihê to şad bo. Oxir bo hevala Hêvî…”