ÎZMÎR – Merdima tepişteyî Fatma Surme dîyar kerd ke cezaya giran yê zîndanî merdimayî nîyê û va eke Tirkîya derheqê aştîye de samîmî ya ganî heqê hêvîye bica bîyaro, destpêk de Rayberê Şarê Kurdî û heme tepişteyan ganî azad bikero.

 

Dimayê vengdayîşê ‘Aştî û Komelê Demokratîkî’ ke Rayberê Şarê Kurdî Abdullah Ocalanî 27ê sibate de kerd, caardişê ‘heqê hêvîye’ yew sernameyanê ke kewt rojeve bî. Caardişê heqê hêvîye dir do Tirkîya de bi hezaran tepişteyî bêrê azadkerdiş. Sazgehê komelê sîvîlî, têgêrayîşê heqanê merdiman, têgêrayîşê huqûqî û xizmê vînîbîyayeyan bêmabêne waştişê caardişê heqê hêvîye anê ziwan.

 

Dayîka tepişteyanê Buryamîn Surme û Ahmet Surme yê ke zîndanê Asayîşê Berzî yê Tekîrdagî de tepişte yê, Fatma Surme derheqê prosesî de qisey kerd.

 

‘Bi no hewa merdim nêeşkeno derheqê aştîye de qisey bikero’

 

Fatma Surme va ke lajê aye Bunyamîn Surme 2018 de ameyo tepiştiş û cezaya girane ci rê ameya dayîş, Ahmet Surme rê zî 20 serrî ceza ameya dayîş û va: “Wexto ke ma derheqê aştîye de qisey bikerê wina nêbeno. Ma aştîyêk bi edaletî wazenê. Ma wazenê tepişteyê ma bêrê azadkerdiş. Prosesêk dest pêkerd la çi heyf tu gamêk pozîtîf nêame eştiş. Semedê kurdan tu çîyêk nêkenê. Ganî destpêk de Serekê ma Abdullah Ocalan bêro azadkerdiş. Eke o azad nêbo ma yew zî azad nîyê.”

 

‘Ganî tecrîd bêro şiknayîş’

 

Fatma Surme bale ante ser waştişanê şarê kurdî û va: “Şarê kurdî zî sey heme şaran azadîye heq keno. Ma do hemverê zordarîyan her tim têkoşîn bikerê. Heta ke no merg, gonî û kiştiş dewam bikero ma nêeşkenê derheqê aştîye de qisey bikerê. Hewceyê heqê hêvîye est o. Ganî tecrîd serekê ma ser o bêro şiknayîş. Ganî tu dayîke nêbermo. Ma pêro dinya rê aştîyêk bi edaletî wazenê. Cezaya muebetan, dardekerdişî ra giranêr a. Merg verê ci de xelasî yo. Ciwanê ma bi serran tepişte yê. Tu çîyêk nêkerdê la bi serran tepişte yê. Êdî bes o.”

 

‘Ma cuyêka adilane wazenê’

 

Fatma Surme bale ante zîndanê sey çalî ser û wina dewam kerd: “Tepişteyê muebetê giranan kenê hucreyê yewkesî. No rast nîyo. Çi heqê şima est o şima wina kenê? Şima dej û azar bi tutanê ma danê antiş. Hêvîya min a tewr pîle caardişê heq û edaletî yo. Ganî ma dest bidê yewbînan. Ganî tepişteyanê ma vera bidê ke  ma vajê aştî ameya. Ma zî sey her kesî cuyêka bi edalet wazenê.”

 

Semedê dayîkan vengdayîş

 

Fatma Surme peynîya qiseykerdişê xo de veng da heme dayîkanê kurdan û tirkan û wina peynî ard: “Dayîkê tirkî nînê nêvanê wa aştî bica bêro. Kezeba înan zî veşena. Her kes nê şerî de merd, ame kiştiş, ame vînîkerdiş. Tena kurdî nê, her kesî vînî kerd. Nê semedî ra ganî semedê aştîye ma dest bidê yewbînan. Ez veng dana heme dayîkan, ganî ma bibê yew ke tutanê xo vînî nêkerê.”