Elfazî Toral

 

STENBOL - Hemsereka Partîya DEMî ya Stenbolî Arîfe Çinar derheqê mîtînga ke do Esenyurtî de bêro kerdiş veng da û va: “Semedê ke îqtîdaro ke sîstemêk xirabî bîyaye bivuryo û hem zî semedê mendişê aştîye ma yenê têhet. Ma heme kesî ra vengê tewrêbîyayîşî kenê.”

 

Partîya Têduştî û Demokrasî (Partîya DEMî), Partîya Têgêrayîşê Kede (EHP), Partîya Kede (EMEP), Federasyonê Meclîsanê Sosyalîstan (SMF), Partîya Karkeran ê Tirkîya (TİP) û Partîya Azadîya Komelî (TOP) 25ê teşrîna peyêne de bi sloganê ‘Ma semedê kede, aştî, edalet û azadîye pîya têkoşîn kenê’ do wareyê Esenyurtî de mîtîngêk bikerê.

 

Mîtîng de do zaf kesî qisey bikerê û bale biancê  meselanê ke şar ciwîyeno ser. Roja ke tarîxê mîtîngî dîyar bî, her taxe û sûkê Stenbolî de, xebatê semedê mîtîngî yenê domnayîş.

 

Hemsereka Partîya DEMî ya Stenbolî Arîfe Çinar va ke Stenbol de nasnameyê cîyayî ciwîyenê, nufusê kurdan zî xeylê zaf o û va: “Cayêk wina de vengê xo berzkerdiş yena manaya ke aştî Tirkîya de mende bibo. Bi vengdayîşê aştî û komela demokratîke dir wextêk derg o ma semedê aştîye xebatan domnenê. Derheqê aştîye de ma zaf kombîyayîşî kerdî. Ma hewl da ke ma xo biresnê her kesî. Problem û endîşeyê her kesî estbî. No mîtîng, ma tena birêxistin nêkenê. Ma bi sosyalîstanê Tirkîya û tifaqanê xo dir birêxistin kenê. Wexto ke ma nê tifaqanê xo dir kerd, ma vat, wa karkerî, cinî û nasnameyê cîyayî tewrê bibê. Armancê mîtîngî mendekerdişê aştîye yo. Na tena polîtîkaya Partîya DEMî nîya, ma qalê prosesêk ke tesîr cuya her kesî ser o keno, qisey kenê. Wexto ke ma vanê aştî, mîtîng zî no îfade keno.”

 

‘Armancê mîtîngî’

 

Arîfe Çinar dîyar kerd ke ê bi sloganê ‘Ma semedê kede, aştî, edalet û azadîye pîya têkoşîn kenê’ mîtîng virazenê û va: “Armancê ma oyo ke ma aştî mende bikerê, vila bikerê. Çike 50 serrî yo dewlete polîtîkaya şerî de israr kena û hewl dana wina bîyayîşê xo bidomno. Wexto ke no şer ame domnayîş, zerrîya kurdan xeylê veşîya. Şarê kurd koçber bî, feqîr bî, problemê pîlî ciwîyayî. Nika Tirkîya de krîzêk giran est o. No netîce eşkera yo. Semedo ke no îqtîdaro ke sîstemê xirabî domneno bivuryo û aştî bêrokerdiş ma pîya ameyî têhet. Ma 25ê teşrîna verêne de meydanê Esenyurtî de yê. Ma heme kesî ra veng danê ke tewrê mîtîngî bibê. Xebatê ma her cayî de domyenê. 39 taxan de xebatê ma est ê. Ma heme kesî rê veng danê ke 25ê teşrîna verêne de saete 15.00ine de Meydanê Esenyurtî de bibê.”