ÎZMÎR - Cinîyan derheqê merdişê biguman ê Rojîn Kabaîşe de dîyar kerd ke kiştoxê Rojîne bi zaneyîş yenê pawitiş û wina vatî: “Kiştoxî dîyar ê û dewlete hewl dana ke nê çî binimno.”

 

Serrêk ra dima, Sazgehê Tibê Edlî va ke nimûneyê DNAyî yê bedenê Rojîn Kabaîşe ser ke bi hawayêko biguman merdî ame dîyayîş, eyîdê di mêrdan ê. Cinî hemverê merdişê biguman ê Rojîn Kabaîşe de reaksîyonê xo dewam kenê.

 

Hemverfeka Meclîsa Cinîyan a Karabaxî ya Partîya Têduştî û Demokrasî (DEM Partî) Nûrsel Guner Sezer, eşkera kerd ke kiştoxê Rojîn Kabaîşe dewleteya mêrdan bî û ê kesê ke qanûnan nêanê ca yê. Nûrsel Guner Sezer va ke Tirkîya de sey cinîye xo asayîş de hîs nêkena. Nûrsel Guner Sezer wina va: “Rêzikname semedê pawitişê kiştoxanê mêrdan ameyî viraştiş. Babîyê ci vano, Rojîne tutêke nêbî xo bikişo. No zanayîşêk bi temamî viraşte yo. Cinîyê ke nê welatî de yenê kiştiş, xeylê rey sey ‘xokiştişî’ yenê binamekerdiş. Bi nê rengî qetlê cinîyan niminenê. Rojîne semedo ke zafêr agahdar û perwerde bibo şîya zanîngehe, la dewlete nêwazena ke cinî û ciwanê kurdî serkêş bê yan zî hişyarîya înan berz bikerê. Na polîtîkayêka şerê taybetî ya. No kerdişêk o ke hetê hukmatî ra ame tesdîqkerdiş. Ez bawer kena ke cinî eşkenê nê rêxistin bikerê û têkoşîn bikerê. Ganî cinî bi yewbînan xover bidê. Ganî cinî hîr bibê, ganî cinî pîya xo ver bidê û ganî semedê heqanê xo vengê xo berz bikerê.”

 

‘Kiştoxî zafêr benê’

 

Dayîka Aştîye Gugerçin Şakar venga heme selahîyetdaranê zanîngehe da ke merdişê biguman ê Rojîne cigêrayîş bikerê. Gugerçin Şakar eşkera kerd ke Rojîn kênaya kurde bî ke ameye qetilkerdiş û va: “No semed ra înan nêwaşt ke aye biwano yan zî perwerde bivîno û aye kiştî. Ma sey cinî hemverê nê de şer kenê. Ma wazenê cinî bi azadî biciwîyê. Ganî cinî bieşkê xo bipawê. Heqê înan est o ke nê çî bikerê. Eke dewlete kîşte cinîyan de bivindertêne, qirkerdiş wina zaf nêbîne. Kiştoxî cinîyan kişenê û dewlete vera ke înan ceza bikero, azadîya înan dana înan. Dewlete pesnê kiştoxan dana. Eke dewlete wina nêzdîyê kiştoxan nêbîne, wina qirkerdişê cinîyan nêbîne. Kiştoxî zafêr benê çike zanê ke dewlete pişta înan de ya. Dewlete hevalê nê qirkerdişan a. Ez wazena heqê cinîyan bibo. Ez wazena cinî bi azadî biwanê. Ez wazena cinîyê kurdan azad bê.”

 

‘Kesê kiştoxî dîyar ê, dewlete hewl dana ke nê çî binimno’

 

Hemsereka Komeleyanê Elewîyanê Demokratîkan (DAD) Fadîme Dapagli eşkera kerd ke xeylê cinî, sey Rojîn Kabaîşe, ameyî kiştiş û xeylê kerdoxî dîyar ê, la dewlete hewl dana ke nê çî binimno. Fadîme Dapagli wina va: “Bi xoverdayîşê keyeyê Rojîn Kabaîşe û helwestê rayaumumî, vejîya ke xokiştiş nêbî bî, la kiştiş bî. Keye semedê nê xeylê têkoşîn kerd. No heme binê zordarîya keyeyî de vejîya. Xeylê cinîyê ma yê sey Rojîne estê ke kerdoxê înan ameyî nimitiş û dewayê înan ameyî akerdiş. No semed ra şerkerdiş xeylê muhîm o. Bi piştgirîya cinîyan, ma vengêk xurt viraşt. Netîce de, dosyaya ke înan hewl da binimnê ameye dîyayîş. Dewlete bi dewamî hewl dana ke qetlê cinîyan binimno. Hedîseyê qetlê cinîyan welat de wina zaf bîyê ke ma nika nêeşkenê înan taqîb bikerê. Xeylê vînîbîyayeyê ma yê nêameyê neqlkerdiş est ê. Sey cinî, ganî ma rêxistin û têkoşînê xo zî xurt bikerê.”

 

Waştişê cipersayîşê qirkerdişî ser bi rayanê AKP-MHP’yî ame redkerdiş

 

Ozgun Yilmaz eşkera kerd ke înan waştî ke qirkerdişî bêrê cigêrayîş û roşnkerdiş, û va: “Cipersayîşê serê qetlê Rojîn Kabaîşe bi rayanê AKP û MHP’yî ame redkerdiş. No senîn mumkun o? Qetlêk est o. Cinî semedê roşnkerdişê nê qirkerdişî têkoşîn kenê. La ê heme çî kenê ke vernîya eşkerayîkerdişê ci bigîrê. No mojneno ke belkî armancêk înan ê sîstematîk est o. Ez wazena ke heme kiştişê cinîyan bêrê roşnkerdiş.”