ANQARA - Endamê KESKî ke hemverê nêheqîyan Amed ra Anqara de waştî şêrê verê meclîsî, hetê polîsan ra ameyî astengkerdiş.

 

Konfederasyonê Sendîkayê Kedkaran (KESK) hemverê dûrvistîşê endamanê xo ke semedê KHKyan kar ra ameyî dûrvistîş, 13ê teşrîna verênê de Amed ra ver bi Anqara bi vatişê “Ma do karê xo peyser bigîrê” dest bi rayîrşîyayîş kerd. Rayîrşîyayîşê endamanê KESKî roja 4ine de resa Anqara.

 

Endamê KESKî nê sibayî waştî ver bi meclîsî rayîr ra şêrê, la ameyî astengkerdiş. Komêk yê endamanê KESKî zî verê merkezê Egîtîm-Senî de ame astengkerdiş û polîsan nêverda ke karmendî şêrê verê meclîsî de waştişê xo bîyarê ziwan. Çalakîya verê Egîtîm-Senî de parlamenterê DEM Partî Mehmet Zekî Îrmez û Yilmaz Hun zî piştgirîya karmendan kerd.

 

Verê merkezê Egîtîm-Senî de polîsan çalakîkeran kerd binê ablûqa. Çalakîkerê ke binê ablûqayî de bî, bi çepîkan û berzkerdişê vatişê “Biciwîyo Xoverdayîşê Kedkaran” reaksîyon vera astengkerdişî mojnayî. Komêk endamanê KESKî zî verê berê meclîsî yê Çankayayî de ameyî astengkerdiş. Ablûqakerdişê karmendan her di nuqteyan de dewam keno û karmendî bêrazîbîyayîş xo mojnenê.