MERKEZÊ XEBERAN - Tedayê rejîmê Îranî yê cinîyanê kurdan ser o dewam kenê. Ame neqlkerdiş ke di aşmî zêdeyêr o cinîya kurde ya sporkere Yelda Îmamdostî bajarê Esfehanî de ameya tepiştiş û heta nika agahî aye ra nîna girewtiş.

 

Malperê Vengê Tepişteyanê Kurdan û Îranî de xeberêke xo de eşkera kerd ke di aşmî zêdeyêr o cinîya kurde bi nameyê Yelda Îmamdostî, ke şarê bajarê Îlanî ya Rojhelatê Kurdistanî ra ya û Esfehanî de ciwîyana, hetê hêzanê Îranî ra ameya tepiştiş.

 

Na xebere de ame vatiş ke teberê heme hewildayîşê keyeyî û hevalanê aye, tu agahî weşîya aye ser û cayê ke Yelda Îmamdostî ci de ya nêame zanayîş.

 

Sewbîna ame dîyarkerdiş ke verî zî çend rey Yelda Îmamdostî semedê çalakîyanê sîyasî û rexneyanê ke îqtîdarî rê kerdêne, hetê hêzanê rejîmê Îranî ra ameya tepiştiş. Wextê tepiştişî de îşkenceyê ruhî û fîzîkî aye rê ameyo kerdiş.

 

Yelda Îmamdostî serra 1975î de ameya dinya, şarê bajarê Îlanî yê Rojhelatê Kurdistanî ra ya, dayîka di tutan a. Yew sporkera namdarê Rojhelatê Kurdistanî û Îranî ya. Xeylêk musabaqayanê mîyanê bajaran de derece girewta.