Buşra Turan

 

WAN - Dimayê ke meclîs abî, cinî derheqê aştîyê de qisey kerdî û vatî: “Heta ke herra Tirkîya ser o aştî pê nêro ma do têkoşînê xo dewam bikerê.”

 

‘Prosesê Aştî û Komela Demokratîke’ ke Rayberê Şarê Kurdî Abdullah Ocalanî dayo destpêkerdiş, bi averşîyayîşanê muhîman dewam keno. Semedê ke no proses ser bikewo û aştî bibo, komelî pabeyê û waştişê înan zêde benê. Cinîyê ke tewr zaf şerî ra tesîr benê, semedê aştîye têkoşînê xo dewam kenê. Cinan bi serkêşîya Têgêrayîşê Cinîyan ê Azadan (TJA), semedo ke aştîyêke mende û azadîya fîzîkî ya Rayberê Şarê Kurdî Abdullah Ocalanî bibo, 1ê teşrîna verênê de Amed ra ver bi Anqarayî rayîrşîyayîşêk dest pêkerd. Rayîrşîyayîşo ke 7 rojan dewam kerd de, cinan aştî û azadî qîrayî.

 

1ê teşrîna verênê de meclîs abî û cinîyan derheqê waştişê aştîyê de ercnayîş kerd.

 

‘Manayîn o ke newe ra aştî bêro qalkerdiş’

 

Aktîvîsta TJAyî Yildiz Çetîn va ke meclîsî de bi serran serdestîya mêrdan est a û Partîya Têduştî û Demokrasîya (DEM Partî) bi sîstemê hemserekî yewin partîya ke temsîlkarîya cinîyan tewr xurt kerda. Yildiz Çetîn wina va: “Rayîrşîyayîşo ke TJAyî 1ê teşrîna verênê de dest pêkerd 7ê teşrîna verênê de Anqara de peynî bî. Rayîrşîyayîş derheqê aştîye de vengêk xurt bî. Temamê hevalê cinî yê ke tewr bî û kede dayî ez înan pîroz kena. Emser akerdişê meclîsî cîya bî. Aştî ame qalkerdiş. Ma cinîyan bedelê girdî dayî. Tayînkirdişê qayûman dir destkewtişê ma yew bi yew şî. Ewro newe ra qalkerdişê aştîye manayîn û bi qîymet o.”

 

‘Vengdayîşê Abdullah Ocalanî muhîm o’

 

Yildiz Çetîn va ke vengdayîşo ke Abdullah Ocalanî 27ê sibatî de kerd rojeva Tirkîya û Rojhelatê Mîyanênî de cayêk muhîm girewt o û wina va: “Rojhelatê Mîyanên bîyo gola gonî. Çareserîya meseleya kurdî dir do zaf problemî bêrê çareserkerdiş. No vengdayîş ma rê manayîn o. Ma cinî veng danê nê vengî û semedê netîceyanê şênberan têkoşîn kenê. Yewine rojeva ma na ya ke no proses sabota nêbo û bi netîce bibo. Hevalê ma yê ke komîsyon de yê, yewser proses taqîb kenê û têkoşînê girdî danê. Rolê cinîyan aştîye de muhîm o. Wa dayîkî êdî nê welatî de nêbermê. Wa aştî bibo û ma bermayîş nêwazenê.”

 

‘Lazim o ma her warî de aştîye qal bikerê’

 

Hemşaredara Westanî Kubra Aktî zî va ke her serre meclîs bi pêrodayîşan abena û emser akerdişê meclîsî hetê cinîyan ra bi hêvî bi. Kubra Aktî wina va: “Ma cinî aştî û şer baş zanê. Semedê nê lazim o ke semedê aştîyê ma çalak bê. Lazim o ma waran, şaredarî, meclîs, keye û kuçeyan de muhîmîya aştîye vajê. Roje amî ma laçikanê xo eşt erd, ma aşman şer vindarna, roje amî ma Amed ra heta Anqara rayîrşîyayîş kerd. Ma cinî muhîmîya aştîye baş zanê. Ma do têkoşînê xo dewam bikerê. Ma zanê aştî çi ya, şer çi yo. Lazim o ma her warî de muhîmîya aştî qal bikerê.”

 

‘Tirkîya de cinan bedelê girdî dayî’

 

Hemşaredara Qelqelî Sakîne Kutpinar zî va ke 1ê teşrîna verênê de bi vindertişê cinîyan akerdişê meclîsî înan keyf dayo û wina va: “Ma cinî na rewşe ra zaf bikeyf ê. Rayîrşîyayîşo ke TJAyî dest pêkerd ma silam kenê. Tirkîya de cinan bedelê girdî dayî. Êdî wa aştî bêro Tirkîya. Cinî bi yewbînan dir têkoşîn kenê. Semedo ke aştî na herre ser o bibo ma do heta peynî têkoşîn bikerê.”