Nazlican Nujîn Yildiz

 

ÎZMÎR - Sereka Komeleya Ewil Cinî û Tutî Mujde Tozbey derheqê îlankerdişê "Serra keyeyî" ya hetê îqtîdarî ra ame îlankerdiş qisey kerd û va: “Îlankerdişê 'Serra keyeyî' şîdet û qetilkerdiş zêde kerdî. No îlanêk sembolîk o. No hewldayîşêk ke netîceyê ci yê hem polîtîk hem zî ekonomî est o.”

 

Vatişê îqtîdarî ke keye pîroz keno, cinîyan planê peyîn de verda, îlankerdişê "Serra keyeyî" zî tesîrêk pîl şîdetî ser û qetilkerdişê cinîyan kerd. Qetilkerdişê cinîyan û tutan ê 8 aşmê ewilî yê serra 2025ine de hêzê xo polîtîkayê îqtîdarî ra girewt.

 

Goreyê çeteleyî şîdetê ajansê ma, 8 aşmê ewilî yê serre de 201 cinî ameyê qetilkerdiş.

 

Şîdetê camêrdî zêde beno

 

Dayeyê çeteleyê şîdetî de ke yenê zanayîş, cinîyê ke yenê qetilkerdiş, hetê camêrdê tewr nêzdîyê xo ra, hetê camêrdê ‘keyeyê pîrozî’ ra yenê qetilkerdiş. Tena 2025ine de nê, dimayê feshkerdişê Peymana Stenbolî, şîdetê mîyanê keyeyî zêde bî û îqtîdar keye pîroz kerd, vatişê ke cinîyan çin hesibneno, ard ziwan, şîdetê camêrdî normal kerd. Nê dayeyî nê caardişan ra xoser nîyê. Îqtîdarê AKP’yî 24 serran de şîdetê camêrdî normal kerd, cinîyan wareyê cuye ra dur vist û hepsê keyeyî kerd. Nê pêro netîceya polîtîkayêk bi zanebîyayîş bî. Serra 2025ine sey serra keyeyî ame îlankerdiş û na çarçewa de nameyê cinî ame vetiş, xebatê wezaretê keye û xizmetê komelî, şîdetê camêrdî zêde kerd.

 

‘Serra keyeyî îlanêk sembolîk nîyo’

 

Mujde Tozbey dîyar kerd ke "Serra keyeyî" îlanêk sembolîk nîyo û va: “Serra keyeyî, cinî sey şexs nê, sey dayîke pênase keno. Barê dewlete milê cinîyan ser o yeno barkerdiş. Yê kreş, xizmet û asayîşê komelî cinîyan ser o yeno barkerdiş. No zî bêşik cinîyan keno hepsê keyeyî û hêzê karî ra dûr fîneno.  Wareyê sîyasî cinîyan rê yeno tengkerdiş û xoserîya ekonomî yeno antiş. Cinîyan rolê seretewênayîşî de tengezar kenê. Her hetî ra rayîr şîdetê cinîyan akeno.”

 

‘Keyeyo pîroz semedê cinî û tutan cayê tewr bi tehluke yo’

 

 

Mujde Tozbey tewr peyîn wina va: “Şikdar mêrê tewr nêzdîyê cinîyan ê. Babî, bira, cinî yan zî merdim. Keyeyo ke ganî semedê cinîyan cayo tewr bi asayîş bo, çi heyf ê keyeyî de yenê qetilkerdiş. Keyeyo ke her tim hetê dewlete ra pîroz yenê vînayîş çi heyf semedê cinî û tutan cayo tewr bi tehluke yo. Ma nê her roje muracatan de vînenê. Cinî her tim hemverê şîdetê camêrdan de têkoşîn kenê. Ganî ma cinî semedê komelêk azad û têduştî her timt têkoşîn bikerê. Ganî ma xoverdayîş bidê mojnayîş.”