ŞIRNEX - Dayîkê Aştîye derheqê prosesî de ercnayîş kerdî û vatî: “Gonî bi gonî nîna pakkerdiş. Encax bi awe bêro şûtiş. 50 serrî yo şerêk dewam keno, est o. Gonîya tutanê ma pêro herra Kurdistanî ser o rijiya. Koyê ma yenê veşnayîş, talankerdiş. Tena hewcedarîya kurdan nê ê tirkan zî bi aştîye est a. Aştî bi azadîya Abdullah Ocalanî mumkin a.”

 

Prosesê aştîye ya bi vengdayîşê ‘Aştî û komelê demokratîkî’ ke Rayberê Şarê Kurdî Abdullah Ocalanî 27ê Sibate de kerd dest pêkerd, dewam keno û dewlete hema cewabêk bi qîm nêdaya bendewarîya rayapêroyî. Dewlete hêrişê hemverê xozaya Kurdistanî dewam kena. 9-10ê êlule de bi serkêşî Platformê Sazgehê Demokratîk (DEKUP) herêma Besta a Şirnexî de bi sloganê ‘hemverê qirkerdişê ekolojî ma rayîr ra şinê’ çalakîya nobete organîze kerdî. Dayîkê Aştîye yê tewrê nobete bî, derheqê prosesî de qisey kerdî.

 

‘Şarê kurdî binê zulmî de yo’

 

Dayîka Aştîye Emîne Oruç dîyar kerd ke aye qirkerdişê daran şermezar kena û va: “Dar bi destê qorîcîyan yenê birnayîş. Êdî bes o. Destê aştîye ganî bêro dergkerdiş. Ma aştîye wazenê. La ê hema şer dewam kenê. Ma pêro têduşt ê. Tutê ma semedê  betalî û bêtêduştî her çar hetê dinya vila bî. Şarê kurdî hema binê zulmî de yo.”

 

‘Ma azadîya serekê xo wazenê’

 

Dayîka Aştîye Nebîhe Akay zî wina reaksîyon mojna: “Na game semedê şarê tirkî zî muhîm a. La çi heyf hema dewleta tirke tu gamêke nêeşta. Ma dayîkî aştî wazenê. Ma wazenê her çar parçeyê Kurdistanî de aştî pê bêro. Ma azadîya serekê xo wazenê. Bêrê ma pêro destê xo bidê yewbînan. Êdî bes o. 50 serrî yo no şer dewam keno. Herra ke gonîya tutanê ma nêrijîyaya nêmend. Çar birayê min estbî hîrê heb şehîd kewtî yew ma. Biraziyê mi, warzayê mi, tornê mi zî wina. Çîyo ke ez ciwîyaya, pêro dayîkî ciwîyayî. Wa êdî tutê ma nêmirê.”

 

‘Wa şer peynî be tepişteyî bêrê veradayîş’

 

Dayîka Aştîye Kiymet Acar zî wina va: “Ma hetê aştîye yê. PKK’yî xo fesh kerd. Gerîlayan çek veşna. Ma komîsyono ke ameyo awankerdiş, qerarê semedê azadîya serekî pawenê. Ganî serekê ma zî sîyasetmedarê ma zî meclîs de ca bigîrê û xebatan bikerê. Wa no şer peynî bibo, wa tepişteyê ma bêrê veradayîş. Wa her kes wayîrê venga aştîye vejîyo. Eke zerrî ra bê, do game bierzê. Hema qiseykerdişê bi kurdkî yeno astengkerdiş. Bawerîya ma bi înan çin a. Heta serek azad nêbo, aştî mumkin nîya.”

 

‘Bê serekî aştî mumkin nîya’

 

Dayîka Aştîye Maşallah Kaya zî ard ziwan ke vengdayîşê Aştî û komelê demokratîk muhîm o û va: “Do heta key gonî birijo. Êdî bes o. Wa kezeba dayîkan nêveşo. Wa leşker, polîs û gerîla nêmirê. Kurdî û PKK’yî çi wezîfe kewt milê înan ser kerd. Wa êdî aştî pê bêro. Wa Birêz Ocalanî dir masa ser o rûşê. Wa serekê ma azad bibo. Bê serekî aştî mumkin nîya.”