Rozerîn Gultekîn

 

STENBOL - Emser yewin rey Musabaqaya Xelatê Rojnamegerîya Cinîyan ê Gurbetellî Ersoz do pê bêro. Endama MKG’yî Dîren Yûrtsever derheqê armancê musabaqa û vurnayîşê ke cinîyan rojnamegerî de kerdê qisey kerd û va: “Merasîm hetê wayşrvejîyayîşê mîrasê Gurbetellî Ersoze de zaf muhîm o. Ma venga her kesî danê ke wayîrê mîrasê Gurbetellî Ersoz û hevalanê aye vejîyê.”

 

Emser hetê Komeleya Rojnamegeranê Cinîyan ê Mezopotamyaye (MKG) ra yewin Xelatê Rojnamegerîya Cinîyan ê Gurbetellî Ersoz do pê bêro. Merasîmê xelate do nameyê Gurbetellî Ersoz û xebatkarê cinî yê çapemenîya ke cuya xo vînî kerdê ser o bo. Muracat 17ê hezîrane de dest pêkerdî, 28ê êlule de do peynî bibê. 8ê teşrîna verêne de zî do xelatî bêrê dayîş. Beşê kurdî, tirkî, fotograf û vîdeoyan de bi pêroyî çar beşan de do xelatî bêrê dayîş. 

 

Endama MKG’yî Dîren Yurtsever derheqê babete de qisey kerd.

 

‘Adetê çapemenîya azad’

 

Dîren Yurtsever dîyar kerd ke adetê çapemenîya azad tarîxî yo û wina va: “Tarîxê çapemenîya azade bi bedel û xoverdayîş ameyê nuştiş. Semedo ke heqîqet vejîyo werte, bedelê pîlî ameyî dayîş. Adetêk çapemenîya azad ke nê bedelî dayê çiman ver est ê. Bombakerdişê sazgehan, înfazkerdişê rojnamegeran, surgun, zext. Rojnamegerê cinî di rey benê hedef. La adetê çapemenîya azad her rey de tewr zêde xurt bî.”

 

‘Ma vengdayîşê wayîrvejîyayîşî kenê’

 

Dîren Yurtsever va, înan mîrasê Gurbetellî Ersoz dewr girewtê û va: “Semedê xurtkerdişî nê wayîrvejîyayîşî ma sey MKG na musabaqa pê anê.  8ê teşrîna verêne de do merasîm pê bêro. Çar beşan de do xelatî bêrê dayîş. Pîlkerdişê nê mîrasî semedê ma wezîfe yo. Ma venga pêro hevalanê xo danê ke wayîrê nê mîrasî vejîyê.”