MERKEZÊ XEBERAN - Îran û Rojhilatê Kurdistanî de aşma temmuze de 71 kesî ameyî dardekerdiş. Yeno vatiş ke zextê şîdetî yê çalakîkeranê sîyasî ser o zêde bîyê.

 

Kampanyaya ‘Sêşemeyê Nê Cezaya Dardekerdişî rê’ ke hetê tepişteyanê sîyasîyan yê 38 zîndanê Rojhelatê Kurdistanî û Îranî ra ameya destpêkerdiş, hewteyê 77ine de, eşkerayîyêke newe derheqê dardekerdişî de vila kerd.

 

Goreyê eşkerayîye serê na aşme ra heta nika (Temmuze) 71 kesî Rojhelatê Kurdistanî û Îran de ameyê dardekerdiş.

 

Eşkerayîye de ame vatiş ke tedayêk çalakîkerê sîyasî û endamê tepişte yê hemleyê ‘Sêşemeyê nê dardekerdişî rê’ yeno kerdiş. Eynî wextî de tehdîd û destbendkerdişê merdimê endamê hemleyî dewam kenê.