ENQERE - Kesên ku di Komkujiya Garê de jiyana xwe ji dest dan hatin bîranîn. Di bîranînê de bang hat kirin ku hemû berpirsyar bên eşkerekirin û darizandin.

 

Konfederasyona Sendîkayên Karmendên Cemaweriyê (KESK), Konfederasyona Sendîkayên Karkerên Şoreşger ên Tirkiyeyê (DÎSK), Yekîtiya Bijîşkan a Tir (TTB), Yekîtiya Odeyên Endezyar û Mîmaran a Tir (TMMOB) û Komeleya Aştiyê ya 10'ê Cotmehê, 103 kesên ku di êrîşa DAIŞ'ê ya li dijî "Mîtînga Ked, Aştî û Demokrasiyê" ya 10'ê Cotmeha 2015'an de li ber Gara Enqereyê hatibûn kuştin, bi bîr anîn.

 

Girse, beriya merasîma bibîranînê li ber stasyona metroyê ya Ûlûsê li hev civiya û bi bêdengî ber bi Gara Enqereyê ve meşiya. Di dema meşê de wêneyên kesên ku di komkujiyê de jiyana xwe ji dest dabûn, hatin hildan. Ji bilî xizmên qurbaniyan, Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari, Serokê Giştî yê Yenî Partiyê Ozgur Ozel û gelek nûnerên partiyên siyasî û rêxistinên girseyî yên demokratîk jî beşdarî meşê bûn.

 

Di merasîma bibîranînê de dirûşmeyên wekî "10'ê Cotmehê ji bîr nekin, nehêlin bê jibîrkirin", "Şehîd namirin", "DAÎŞ a kujer, AKP'ya hevkar" û "Roj wê bê, dewran wê biguhere û kujer wê li bara gel hesab bidin" hatin berzkirin. Ji bo kesên ku jiyana xwe ji dest dan, saet di 10:04'an de, ku di wê kêliyê de komkujî pêk hatibû, deqeyek rêz hat girtin.

 

Piştî xwendina helbestan, Seroka Konseya Navendî ya Yekitiya Bijîşkan Tirk (TTB) Pinar Saîp, li pêşiya Gara Enqereyê daxuyaniya çapemeniyê ya hevpar a ku li ser navê rêxistinan hatibû amadekirin, xwend.

 

Pinar Saîpê ku kesên di komkujiyê de jiyana xwe ji dest dan bi bîr anîn, diyar kir ku komkujî êrişeke li dijî aştî, demokrasî û kedê hatiye kirin. Pinar Saîpê bilêv kir ku ew ê şopdarê têkoşîna kesên jiyana xwe ji dest dane bin û got: "Ancax aştiyeke gerdûnî û mayinde dikare li welêt edaleta civakî ava bike."

 

Her wiha Pinar Saîpê bal kişand ser Pêvajoya Aştî û Civaka Demokratîk jî û got ku aştiya mayinde ne bi polîtîkayên înkar û ewlehiyê, bi li ser zemîneke siyaseta demokratîk û hemwelatîbûnê û mafên mingehîn pêkan e. Pinar Saîpê destnîşan kir ku divê pêvajo bi îradeya hemû derdorên civakê bê meşandin.

 

Pinar Saîpê biryardayîna xurtkirina têkoşîna ked, aştî û demokrasiyê destnîşan kir û got ku divê hemû kesên tiliya wan di komkujiyê de heye bên eşkerekirin.  

 

Piştî daxuyaniyê beşdaran qurnefîl danîn ber Bîrdariya 10'ê Cotmehê.