NAVENDA NÛÇEYAN - Wezîra kar û barên civakî û kar a hikumeta demkî bi nûnerên sazî û rêxistinên Rêveberiya Xweser ên herêma Cizîrê re civiya û girîngiya baştirkirina xizmetguzarî û alîkariya mirovî, yekkirina saziyan û xurtkirina hevkariyê gotûbêj kir.

 

Wezîra kar û barên civakî û kar a hikumeta demkî Hind Qebawat îro bi şandeyeke fermî re serdana parêzgeha Hesekê kir.

 

Di nav şandeyê de rêveberê kar û barên siyasî yê parêzgehê Ebas Huseyîn û endama Meclisa Gel Zengîn Ebdo hebûn.

 

Di civîneke çapemeniyê de, Hind Qebawat diyar kir ku armanca sereke ya serdanê ew bû ku ji bo hemû sûriyeyiyan aramî û jiyaneke birûmet pêk were. Her wiha bal kişand ser girîngiya xebata bi hev re wekî tîmeke yekgirtî û diyar kir ku komîteyeke pispor li gorî demeke diyarkirî dest bi xebata xwe li ser pêvajoya yekkirinê kiriye.

 

Hind Qebawat her wiha bi amadebûna şêwirmenda Rêveberiya Xweser a Cizîrê Jiyan Hesen, li gel hevseroka Meclisa Rêveber a Rêveberiya Xweser a Demokratîk Vîviyan Beho Osî û nûnerên Desteya Kar û Barên Civakî û Kedê, civîneke girtî bi karmendên Desteya Kar û Barên Civakî û Kar a Rêveberiya Xweser re li dar xist.

 

Wê her wiha serdana Navenda Çand û Hunerê ya Hîlal Zerîn kir, li wir bi nûnerên rêxistin û komeleyan re civiya.

 

Biryar e ku wezîr paşê bi hevseroka Daîreya Têkiliyên Derve ya Rêveberiya Xweser Îlham Ehmed û rêveberên Kongra Star re bicive û rewşa jinan û mafên wan li Sûriyeyê gotûbêj bike.