Rozerîn Gultekîn

 

AMED - Dayîka Veysel Ozdemîro ke Pirsûs de hêrişê DAIŞî de ame qetilkerdiş, Rabîa Ozdemîr wina vat: “Êdî Veyselê mi çin o. Parçeyêj kezeba mi binê erdî de yo. Ma aştîye wazenê labelê wa dosya nêro girewtene. Lajê min o 22 serre merd, kamî no kerd? Kamî rayîr akerd wa bêro vînayîş.”

 

Ciwanê SGDFyî ke bi sloganê "Me pîya pawit, ma pîya awan kenê" kampanya da destpêkerdiş, pêkayî, kitabî û zafê hewcedarîyî arê dayî û waştî berê Kobanê. 20ê Temmuza 2015ine de ver bi Pirsûsî kewtî rayîr. Bi desine ciwanê ke verê Merkezê Kultur û Hunerî yê Amara de ameyî pêser, demo ke beyanat dayêne de, DAIŞî hêrişê bombaya ganî kerd. Hêriş de 33 Raywanê Xeyalî dinyaya xo bedelnayî, 100 ra zêdeyêr kesî zî birîndar bî. Serê serebûtî ra 11 serrî derbas bî. Yew keso ke dinyaya xo bedelnaye Veysel Ozdemîr bi. Dayîka ey Rabîa Ozdemîr lajê xo qal kerd.

 

‘Êdî Veyselê mi çin o’

 

Rabîa Ozdemîr da zanayene ke dejê aye hema zî sey roja verêne teze yo û vat: “Yew roje zî aqilê me ra nêvejîyeno. Dejê me sey roja verêne teze yo. Yew reyke de şi, nê semedî ra ez vana qey do hema rojêk ber bigino piro û bêro. Veysel heta o dem teberê bajarî ra nêvejîyabi. Reya verêne o dem şi. Roja diyîne yê roşanî bi, xatir waşt û şi. Ma nêzana ke do şêro Kobanê. Keyeyê xo ra zaf hez kerdêne. Sibayî saete 11.00 bi, şi. Ma zî şîyî dewe. Ma dewe de bî ma teqîyayîş eşnawit. Ez Veysel gêraya cewab nêda. Ez şan de şîya keye, cîrane mi vat, Veysel şîyo Pirsûs. Min zî vat, Pirsûs kotî de yo? Vat, birîndar o. Mi nêdî lajê me senî defin kerdî. Nê semedî ra zî ez hema zî bawer nêkena ke merdo.”

 

Semedê tutan şibi

 

Rabîa Ozdemîr dîyar kerd ke lajê aye zaf tutan ra hez kerdênê û ardimê merdiman kerdênê û wina dewam kerd: “Qijê ma bi. Qet teber de nêxebitîya bi. Mi nêwaştênê bixebitîyo. Labelê aşmêk yew ca de xebitîya, bi ê heqdestî semedê tutan çîyêk girewtibi. Xo rê cil û solî girewtibî. Hema cilê xo yê neweyî xo pay nêkerdibi, şi. O mi rê bi dert. Veysel her çîyê xo merdiman dir pare kerdênê. Pîlan dir pîl, tutan dir tut bi.”

 

Ewnîyayîşêk ke heqîqet vet werte

 

Rabîa Ozdemîr wina peynî ard: “Ma her tim hetê aştîyêk ke heqîqetî vejena werte de yê. Ma nika têkoşînê edaletî raybarenê. Ma edalet wazenê. Kezeba me veşena. Parçeyêk kezeba mi binê erdî de ya. Tutê mi bêsûc û guna bi. 33 tutê ma merdî. Hema zî kiştoxî nêameyê tepiştene. Wa edalet bica bêro. Ez heta peynî dest têkoşînê edaletî ra veranêdana. Ez heqê xo helal nêkena. Ma aştîye wazenê labelê wa serê serebûtî nêro girewtene.”