WAN- Meclîsê Cinîyan ê DEM Partî bi sloganê “Bi têkoşînê azadîya cinîyan ver bi komelê demokratîkî” Wan de “Konferansê Kongreya Girde yê cinîyan o 5.” ê şaristananê Wan, Colemêrg, Bedlîs û Mûşî viraşt.

 

DEM Partî kongreya xo ya pêroyî ra ver ke do aşma êlule de viraza, herême de konferansan virazena. Na çarçewa de Meclîsê cinîyan ê DEM Partî bi sloganê “Bi têkoşînê azadîya cinîyan ver bi komelê demokratîkî” Wan de Salona Konferansê ya Tahîr Elçî de “Konferansê Kongreya Girde yê Cinîyan o 5.”   ê şaristananê Wan, Colemêrg, Bedlîs û Mûşî viraşt. Hemserekê cinîyan ê DEM Partî û DBP’yî yê şaristan û qezayan, aktîvîstê TJA, endamê meclîsanê şaredarîyanê DEM Partî û endam û rayberê sazgehanê komelkî beşdarê konferansî bîyî. Kombîyayîşî seba cangorîyanê têkoşînê azadîye rêze ameye girewtene.

 

Konferansî de qiseykerdişê destpêkê Hemsereka DEM Partî ya Wanî Gulşen Kurt kerd. Gulşen Kurt bale ante Prosesê Aştî û Komelê Demokratîkî ser o ke 27ê sibate ra nat yeno rayraberdiş û dîyar kerd ke cinî bi serran o seba aştî têkoşînî rê pêşengîye kenê. Gulşen Kurt dewamê qiseykerdişê xo de bale ant têkoşînê cinîyan û amancê konferansî ser o û wina vat: “Têkoşînêk est o ke 52 serrî yeno rayraberdiş û pêşengê nê têkoşînî zî cinî yê. Amancê nê konferansî no yo ke ma munaqeşa bikerê ke mabenê 3 serran de kêmasîyê ma çi bîyê û ma do bi pêşnîyazanê neweyan rayîrê têkoşînê xo hêzdarêr bikerê.”

 

Gulşen Kurt qiseykerdişê xo de bale ant tecrîd û statuyê Rayberê Şarê Kurdî Abdullah Ocalanî ser o û vat: “Amancê konferansê ma no yo ke Rayberê Şarê Kurdî bibo wayîrê statu û nê prosesî de rayîrê ma akero; ma ewro seba ey tîya yê. Rayîro tewr muhîm ê nê prosesî rêxistinkerdiş o û ma zî seba ey tîya yê. Ma tena Kurdîstan de ney, Tirkîya de zî seba nê têkoşîn kenê.”

 

Dima ra endamê koordînasyonê cinîyanê DEM Partî yê merkezî Sudan Guven qisey kerd. Sudan Guven dîyar kerd ke ê demêko tarîxî ra derbas benê û wina vat: “Amancê na kongreya pêroyî ya DEM Partî awankerdişê komarêka demokratîk o. Nê prosesî de rolê cinîyan zî muhîm o. Bi nê amancî ma konferansanê herêmîyan virazenê.

Nê prosesî de ma xo baş rêxistin nêkerê, ma teda rê nêbê çareserî ke cinîyan ser o ya. Ma teng mendê, ma xo nêresna heme dewan û kuçeyan û heme cinîyan. Ma xo reyde sînordar mendê. Ma meclîsî de zî sîyasetê cinîyan bi hawayêko hêzdar rayra nêberd. Xorexistinkerdiş û rayberî de ma zaf kêm mendê. Nê babetan de ez xo rexne kena. Ma do cehd bikerê ke nê babetan de kêmaneyanê xo pîya çareser bikerê û xo bi hawayêko hêzdar rêxistin bikerê.”

 

Badê qiseykerdişanê destpêkî konferans çapemenî rê girewte dewam kerd.