ÊLIH - Emîne Kayar û Esra Sîncar yê ke emrêk qijî de dest bi xebate kerdî, bi têkoşînê kede yê bi serran xo rê cuyêka newe awan kerdî. Her di cinîyan bale ant muhîmîya xoserbîyayîşê ekonomî û mesajê lazim o ke cinî linganê xo ser o bivinderê dayî.

 

Cinîyê ke emrêk qijî de mecbur manenê tewrê cuya xebatw bibê, pêwa ke serrî vîyarenê zî barê feqîrî, bêtêduştîya cinsîyetî, bêheqî ancenê. Emîne Kayar û Esra Sîncar yê ke emrêk qijî ra kede danê, têkoşînê xo yê cuye ajansê ma JINNEWSyî rê vatî.

 

‘Ez hewcedarê tu kesî nîya’

 

Emîne Kayar a ke 14 serrîya xo de dest bi deştişî kerda û 35 serrî yo xebata xo domnena wina va: “35 serrî yo deştiş kena. 8 serrî yo dikanê cilê pêroyî xebitnena. Sey her xebatêke na xebate zî zehmet o. La hetê weşî no yo ke ma hewcedarê tu kesî nîyê. Ma linganê xo ser o vindenê. Nê semedî ra ez her wext cinîyan rê vana; linganê xo ser o bivinderê. Cinîyê ke bi keda xo debarê kenê hewcedarê kesî nêbenê. Ez 14 serrîya xo de şîya kursanê neqş û deştişî. Zafê keyeyan destûr nêdayî ke kênayê înan şêrê. La babîyê mi tu wext vernîya ma negirewt. Merdimêk zana bi. Ez 15 serrîya xo de ameya zewicnayîş. O wext zewacî rew pê amêyne. Kênayêka mi ameye dinya. Mi mêrdeyê xo vîndî kerd. Dimayê ke mêrdeyê mi şi, ez û bi kênaya xo tena mendî. Keyeyê mêrdeyê mi estbî la ez bi keda xo lingan ser o menda.”

 

‘Mi cil û belg deştê’

 

Emîne Kayar dewam kerd û wina va: “Semedê cinîyan xoserbîyayîşê ekonomî şertê verêne yê azadîya cinîye yo. Makîneyê min ê deştişî estbî. Mi cilê cinîyanê taxe deştêne. Mi çeyîzê ciwanan viraştêne. Pîko xebatêke sebrî wazena. Ez bi şewe heta 02.00ine xebitîyayîne. La mi dî ke ez bi keda xo hewcedarê tu kesî nêbena. Ez bi keda xo lingan ser o menda. Mi wina tercîh kerd. Mi waşt ke kênaya mi destê tu kesî rê nêewnîyo. Lazim o ke cinî linganê xo ser o bivinderê.”

 

‘Wa xebate ra nêtersê’

 

Esra Sîncar a ke 10 serrîya xo ra heta nika sektorê tekstîlî de xebate kena, 18 serrîya xo de yena zewicnayîş û dimayê demêk xebate rê mabêne dana. Esra Sîncar dîyar kena ke dima ra ancî dest bi xebate kena û wina va: “Sektorê tekstîlî zehmet o la semedê ke ez meslegê xo rê wayîr a ez hêz gêna. Nika ez perde û rîyê lihîfan derznena. Verê mi cil û belg deştêne. Xebata ma zehmet a. La sewbîna çîyêk ma bikerê çin o. Barê cinîyan hîna zehmetêr o. Ma şinê keye, uca de zî xebate kenê. La pêwa her çîyî ez kêfweş a. Wa cinî xebate ra nêtersê. Demê verênan ez zî tersayîne. La dimayê xebate ez bi xo bawer bîya. Wa cinî nêtersnê, bixebitîyê.”

 

‘Cinî mêrdan ra xurttêr ê’

 

Esra Sîncar eşkera kerd ke tewrê kursanê cîya bîya û wina qedêna: “Mi perwerdeyê xo nîmced verda la mi dima ra telafî kerd. Ma Edeneyî ra ameyî Êlih. Uca îmkanî çinbî. Ez Êlih de tewrê kursan bîya. Dima ra ancî sektorê tekstîlî de xebitîyaya. Ez xebata xo ra hes kena. Cinî şenê her çîyî bikerê. Wa bi xo bawer bibê.”