STENBOL - Sereka Komeleya Demê Cinîyan Şukran Demîr bernameyê "10 serre keye û nifûsî" ya îqtîdarî erjnayîş kerd û va bedenê cinîyan mîyanê merkezê polîtîkayanê nifûsî de ameya bicakerdiş û wina va: “Cinîyan seba heqê cuya xo têkoşîn danê. Labelê xurtkerdişê keyeyî zî şîdetê mêrde-dewlete giran keno. Ganî cinî xeta têkoşînî pîya pîl bikerê.”

 

Bernameyê "10 serran a Keye û Nifûsê" yê ke îqtîdarî Rojnameyê Fermî de weşan kerd û kerd caardiş, sey sewîyeyêke newe yê polîtîkayan ke cinîyan cuya komelî ra birnena û hepsê banî kena, yena erjnayîş. Cinîyan dîyar kenê ke heqê cuya, beden, azadî û keda cinîyan ameyo hedefgirewtiş û vera naye vengdayîşê seba pîlkerdişê têkoşînî kenê. Sereka Komeleya Demê Cinîyan Şukran Demîr der heqê babete de qisey kerd.

 

‘Cinî sey hacetan yenê pênasekerdiş’

 

Şukran Demîr va ke bi bernameyê "10 serranê keye û nifûsî" babeta bîyayîşê domanan vetê vernî û va cinî sey hacetî yenê vînayîş, hewl danê ke babeta bîyayîşî ya ke ameya war, reyna berz bikerê. Şukran Demîr wina ard ziwan: “Sernameyê bîyayîşî yê mîyanê bernameyê de bi tena serê xo vera cinîyan de nêheqîyêk o. Cinî ewro mecbûr manenê ke seba heqê cuya xo têkoşîn bikerê. Ma cînayetê vera cinîyan ke her ke şonê zêde benê, çiman ver bigîrê. Keyeyî vejenê vernî û cinîyan, azadîya cinîyan çin hesibnenê. Ma naye weş vînenê. Nê semedî ra ma mecbûr ê ke têkoşîn bikerê.”

 

‘Seba başkerdişî tu hewldayîşêk çin yo’

 

Şukran Demîr bale ant serê problemanê cinîyan ê ke wareyê ekonomî, komelî, sîyasî, têduştî, xizmetê zerrê banî û kede de ciwîyenê û va ganî nê babetî bêrê başkerdiş. Şukran Demîr wina dewam kerd: “Şewêke de peymana ke cinîyan pawitêne fesh kerdî. Ma ewro seba naye şahîdîya qetilkerdişê cinîyan kenê. Êyê ke qerar danê, êyê ke polîtîkayan vecenê, seba pawitişê cinîyan tespîtan nêgînê rojeva xo. Labelê ma ewnîyenê ke ewro nifûs pey de mendo û seba naye xelas bikerê plana 10 serran eşkera kenê. Cinîyan zî persê ‘çira peymana Stenbolî fesh kerdî’ persenê û têkoşînê xo danê. Seba başkerdişê heqanê komelî, perwerde, ekonomî û heme heqanê komelî şenê tayê çîyî bêrê caardiş. Labelê çi heyf tu çîyêk nîno caardiş. Seba başkerdişî hewldayîşêk çin yo.”

 

Şukran Demîr peynîya qiseykerdişê xo de ard ziwan ke yewine rayîrê têkoşînê vera bernameyê "10 serranê keye û nifûsî", hîrakerdişê xeta têkoşînê yewbîyaye ya cinîyan a û ganî cinî her wextî ra zafêr pîya ca bîgîrê û bêrê pêser.