Rabîa Onver

 

COLEMÊRG - Colemêrg de merkezê bajarî ra bigîrê hetanî wareyanê koyî, bi kamera û caardişê "Herêma asayîşê taybetî" binê ablûqa de yo. Rayîrî, zozanî, herêmê bejayî bi zêdebîyayîşê kontrolanê leşkeran ameyê vurnayîş û bîyê sey zîndanêko akerde.

 

Colemêrg û qezayê ci serranê peyênan de bi caardişê "Herêma asayîşê taybetî", sîstemanê kamera û çimdarîyê elektronîkî binê kontrolêk zaf hîra û pîle de yê. Rayîrî, zozanî, xetê sînorî û koyî yenê taqîbkerdiş.

 

No tablo paradigmaya asayîşê ke metodanê leşkeran şixulnena, mojnena. Polîtîkayê asayîşî yê ke dewlete bi serran o herême de rayra bena, êdî bi operasyonan, baregehanê leşkeran yan zî nuqteyanê kontrolî yê fîzîkîyan sînor nêbena; bi mekanîzmayanê taqîbkerdişê teknolojîkî ver bi seranserê cuya rojane vila bena.

 

Kamerayî ameyî ronayîş

 

Bi taybetî bi hîrabîyayîşê wareyanê ke sey "Herêma asayîşê taybetî" ameyê îlankerdene, zaf dewî û zozanî seba sîvîlan ameyê girewtiş û mîyanê wareyanê qedexekerdeyan de Begalte, Dev, Herke, Qelet, Bavê û Bedev est ê. Yeno dîyarkerdiş ke nê wareyan de têgêrayîşê leşkerî zêde bîyo û kamerayî ameyî bicakerdiş.

 

Polîtîkayê asayîşî mende kerdî

 

Îlankerdişê "Herêmanê asayîşê taybetî", sey caardişê asayîşê demkî bêro pêşkêşkerdene zî mîyanê wextî de nê mende kerdê. Vejîyayîşê zozanan ame sînorkerdene, têgêrayîşê bejayî vistê binê kontrolî û tayê wareyî seba sîvîlan ameyî girewtiş. Na rewşe hîsê merdimanê herêmî ser o tesîrêk negatîf keno.

 

Ver bi atmosferê ‘zîndanêko akerde’ beno

 

No sîstemê taqîbkerdişî yê herême seba merdiman tenê sey caardişêk asayîşî nîno vînayîş. Hîsê taqîbkerdişî, nuqteyê kontrolî, herêmê qedexeyî û bi mekanîzmayanê elektronîkan taqîbkerdiş, şarê herême ver bi atmosferê "Zîndanêko akerde" rê beno.