Gulistan Gulmuş

 

RIHA - Birazîya Rayberê Şarê Kurdî Abdullah Ocalanî, Gulsum Ocalane ke reya yewine serdayîşê betlaneyî de Abdullah Ocalanî dir pêvînayîş kerd, dîqet ant ser ke wa tecrîdo dewamî peynî bêro û wina va: “Bi serran o ez bi heyecan a û xeyal kena ke ez rî bi rî ey bîvînî. O demê ke mi ey dî, fikarê mi peynî bî. Semedê ke no proses ser bikewo, ganî tecrîd peynî bibo.”

 

Rayberê Şarê Kurdî Abdullah Ocalanî, 28ê Gulane de çarçeweya serdayîşê roşanî de keyeyê xo dir pêvînayîş kerd. Buroyê Huqûqî yê Asrinî neql kerd ke Abdullah Ocalan û tepişteyê bînî yê ke Zindanê Îmralî de yê, keyeyanê xo dir pêvînayîş kerdî. Demê serdayîşî de, Abdullah Ocalanî endamanê keyeyî Gulsum Ocalane, Omer Ocalan û Mehmet Reşît Ocalan dir pêvînayîş kerd.

 

Gulsum Ocalane ke demê pêvînayîşî de uca de bîye û reya yewine Abdullah Ocalan dî, dîqet ant ser ke hewnê aye yê verênî yê rîbirîbîyayîşî pê ameyî û erjnayîşê xo yê derheqê nê qewmîyayîşî û prosesê dewamî de ajansê ma dir pare kerd.

 

‘Bi serran o ez hesretê ey ancena û xeyal kena ke ez ey bîvînî’

 

Gulsum Ocalane hîsê xo yê derheqê reya yewine vînayîşê Abdullah Ocalanî de bi nê vateyan ardî ziwan: “Mi cuye xo de qet Birêz Abdullah Ocalan nêvînabi. Hem fikran de hem zî hîsan de, ez bîya şahîdê raştbîyayîşê netîceyanê ke mi derheqê ey de girewtibî. Bi serran o, ez hesreta ey ancena û xeyal kena ke ez rî bi rî ey bîvînî. Semedê naye ra, ez her çîyo ke mumkin o goreyê planî nêşêro ra tersayêne û bîya dizerrî. No fikar o demê ke mi ey dî, peynî bîyî.”

 

‘Têkoşînêko dewamî lazim o’

 

Gulsum Ocalane dîyar kerd ke ganî no proseso ke hetê Abdullah Ocalanî ra ameyo destpêkerdene, bingehêko demokratîk de sey “fersendêk” bêro hesibnayene û wina dewam kerd: “Goreyê keda pîle û xoverdayîşê ke Birêz Abdullah Ocalanî nîşan da, hem seba sazîyanê sîyasîyan hem organîzasyonanê cîmatê sîvîlî hem zî seba şarî kedêka giran û dewamî lazim a ke nê prosesî fam bikerê, xurt bikerê û bikerê destkewteyêk. Tu destkewte asayî nêbeno. Reyna, bi nê helwestê ke şarê ma bi pêro perçeyanê xo nîşan bido, bi têkoşîn, xoverdayîş û kerdene ke seba çareserî xo ferz biko, mumkin o.”

 

‘No qonax bi xêrê israrê şorişgêrî ameyî na sewîya’

 

Gulsum Ocalane waştişê weşkerdişê şert û mercanê Abdullah Ocalanî û peynîbîyayîşê tecrîdê serê ey kerd û va: “Yewbîyayîşê şarê Kurdî û serekî tena bi peynîbîyayîşê tecrîdî beno. Nasbîyayîşê statuyê şarê kurdî û serekî pêwa giredîyaye bî. Statuyê Birêz Ocalanî statuyê şarê kurdî yo. Serfîrazîya nê prosesî ke bi xêrê israrê şorişgêrî mîyanê şertanê tecrîdî de fersend viraşt û resa nê asayîşî, na sewîya bi xêrê israrê şorişgêrî ameyî nê qonaxî. Dimayê peynîbîyayîşê tecrîdî zî do serfîrazîyêk mitleq pê bêro.”