AMED - Cinîyê ke meydanan de bi reng, waştiş û serewedaritişê xo rengîn kerdî, dîyar kerdî ke azadîya Rayberê Şarê Kurdî Abdullah Ocalanî yeno manaya azadîya cinîyan zî û waştişê xo yê vînayîşê Abdullah Ocalanî yê mîyanê înan de ardî ziwan.

 

Têgêrayîşê Cinîyanê Azadan (TJA) û Platformê Cinîyan ê Dîcle Amedî (DAKP) vizêrî Meydanê Îstasyonî yê qezaya Yenîşehîrî ya Amedî, bi sloganê "Ma bi xoverdayîşê xo azad kenê, ma cimatêk demokratîk awan kenê" semedê 8ê Adare Roja Cinîyan a Dinya mîtîngêk organîze kerdî. Cinîyê bajarên derûdorê zî beşdarê mîtîngî bî. Cinîyan cilê xo yê kurdî kerdîbî xo pay û bi sloganê sey "Jin, Jiyan, Azadî", "Bijî Berxwedana Jinan" û "Bê Serok Jiyan Nabe" veng dayî.

 

'Cinî Abdullah Ocalanî dir azad bî'

 

Mîtîngo ke bi hezaran kesî beşdar bî, hem mesajêk hempar û hem zî serewedaritişêk hempar ê cinîyan mojnayî. Mîtîng ke 7 ra heta 70 serre her emrî merdimî beşdar bî, cinîyan bale ant rolê Rayberê Şarê Kurdî Abdullah Ocalanî ser û vatî, "Abdullah Ocalan o kes o ke erjê cinîyan berz keno. Abdullah Ocalan serkêşêk pîl o ke reya ewil dinya de rayîr verê heme cinîyan akerd, waştişê azadî û xoverdayîşê înan kerd. Semedo ke cinî ey dir azad bî, ê xo ey reyde nas kerdî.”