Rozerîn Gultekîn

 

WAN - Avûkate Jiyan Ozkaplan derheqê qetilkerdişê cinîyan û polîtîkayê bêcezakerdişî de qisey kerd û va: “Hetêk ra vanê serra keyeyî, heto bîn ra ma ewnîyenê ke gumanbarî zerreyê keyeyî ra yê. Ganî bi na rastîye bêrê rî bi rî. Cinîye çira întîxar kerd? Nê de kam sûcdar o? Dewlete û yê şîdetî pê anê sûcdar ê.” 

 

Qetilkerdişê cinîyan roj bi roje zêde benê û gorê çeteleyê ajansê ma ya aşma çileyî de tewr tay 15 cinî û 3 tutî ameyî qetilkerdiş, 9 cinî û 3 tutî biguman dinyaya xo bedelnayê. 10 serrê ke bêrê serra keyeyî ame îlankerdiş labelê kiştoxî keyeyî ra yê babî, bira, mêrde zî nêvînaye yenê. No zî qetilkerdişan zêde keno. 

 

Temsîlkara Sereka Baroyê Wanî avûkate Jiyan Ozkaplan derheqê babete de qisey kerd. 

 

Gumanbar keyeyî ra yo 

 

Jiyan Ozkaplan da zanayîş ke qetilkerdişê cinîyan netîceya bêtêduştîya cinsîyetê cimatî yo û va: “Dewletî goreyê mevzuatê netewî û mîyanneteweyî ganî heqê cuyayîşî bipawê. Labelê ma pratîkan ra ewnîyenê huqûq tenya kaxizî ser o. Ganî dewlete berpirsiyariyan bica bîyaro. Welat de bêtêduştîya cinsîyetî giran bîya. Yê ke nê keno zî mekanîzmayê hukmî yo. Sebebê zêdebîyayîşê cînayetan polîtîkaya bêcezakerdişî ya. Gumanbarî nê qerarî ra cesaret gênê. Semedê rewşa baş û tehrîkê bêheq senaryo yenê awankerdiş û no sebebê vistişê ceza yeno qebûlkerdiş. Gumanbarê ke cinîyan ver bi întîxarî anê, babî, bira û mêrde yo. Ganî bi na rastîye bêrê rî bi rî. Hetêk ra serra keyeyî îlan kenê heto bîn ma ewnîyenê ke gumanbar kesê keyeyî ra yê.” 

 

Cinî çira întîxar kenê? 

 

Jiyan Ozkaplan va semedê caardişê polîtîkayan qetilkerdişê cinîyan zêde bîyo û wina dewam kerd: “Ganî dewlete berpirsiyariyê xo bica bîyaro û îfadeyê cinîyan esas bigîro. Dewlete berpirsîyara ke vernîya şîdetî bigîro, şîdetî vindarno. Cinî binê şîdetêk pîl de yê. Mekanîzmayê ke cinî muracat kenê ganî îfadeyê cinîyan esas bigîrê. Labelê ma ewnîyenê ke na sewîya de xeylêk probleman dir rî bi rî yenê. Ma dosyayê mergê biguman yê sey întîxar derbas benê taqîb kenê. Çira cinîye întîxar kerd? Nê de sûcdar est o. Sûcdar dewlete û yê şîdetî pê anê. Ma peyserê mergê biguman biewnê yeno vînayîş ke aye ver bi întîxarî berdê.” 

 

Jiyan Ozkaplan peynîya qiseykerdişê xo de eşkera kerd ke Wan û herêmê Serhedî sey Merkezê Heqê Cinîyan a Baroyê Wanî de xeylêk dosyayan taqîb kenê û labelê dadgehe waştişê tewrbîyayîşê înan her tim red kena. Jiyan Ozkaplan eşkera kerd ke ganî hemverê şîdet û qetilkerdişî de tu kes bêveng nêmano û va: “Ganî babeta berpirsiyariyê ke kewenê milê heme kesî ser xesas bê. Semedê vernîgirewtişê şîdetî ganî têgêrayîşê hemverê şîdetî têgêrayîşêk rast bibo. Ganî tenya kaxidî ser nêmano. Ganî tedbîrê bi tesîr bêrê girewtiş. Semedê nê zî ganî xebatî bêrê domnayene. Cinîyê ke şîdetî vînenê eşkenê muracatê merkezê heqê cinîyan, rêxistinê cinîyan û komeleyê cinîyan bikerê.”