Neslîhan Kardaş

 

ŞIRNEX - Îdarekara CUDÎ-DER’î Evîn Kulja bale ant serê muhîmîyê perwerdeyê ziwanê dayîke û va: “Ganî pêşdibistane ra heta zanîngehe bi ziwanê dayîke perwerde bêro dayîş.”

 

Pêwa polîtîkayê înkar û îmha yê kurdan ser, bi serran o polîtîkayê asîmîlasyonî yenê domnayene. Polîtîkaya şerê taybetî yê şarî ser o yenê domnayene nimûneyê tewr gird o. Hewl yeno dayîş ke ziwan û kultur bi şarê kurdî bêro xovîrrakerdiş û şar nasnameyî ra bêro dûrvistiş. Qedexe, astengî û mudaxaleyê îdarî her tim rojeve de yê. Betalkerdişê bernameyê kurdkî, wedaritişê tabelayê kurdkî û xizmetê ziwanê kurdkî bi sebebê ‘hemverê usulê yo’ yeno redkerdiş. Zextê kurdkî ser o dewam kenê. Pawitoxê ma dîyar kenê ke no binpaykerdişê azadîya fikr û fehmî, kultur û nasnameyî yo. Şarê kurdî bi serran semedê ziwanê dayîke têkoşînê xo domnenê.

 

Îdarekara Komeleya Cudî (CUDÎ-DER) Evîn Kulja derheqê hêrişê ziwanî û muhîmîyê ziwanê kurdkî ser de ercnayîş kerd.

 

‘Kurdkî ser o polîtîkayê asîmîlasyonî yenê domnayene’

 

Evîn Kulja da zanayîş ke şarê kurdî bi serran o herra xo ser o bi ziwanê xo ciwîyeno û wina va: “Ma sey şarê kurdî bi ziwanê xo qisey kenê û ciwîyenê. Labelê çi heyf pêşdibistanê heta zanîngehe hêriş û asîmîlasyon est o. Heme cayî de polîtîkayê asîmîlasyonî yenê domnayene.”

 

‘Ma her hîsî bi kurdkî ciwîyenê’

 

Evîn Kulja dîyar kerd ke semedo ke ziwan vînî nêbo, çin nêbo berpirsyarîyê ewilî keweno milê dayîkan ser o û va: “Tutî pîzeyê dayîke xo de bi kurdkî dest bi cuyayîşî kenê. Nê semedî ra ganî dayîkî tutê xo dir kurdkî qisey bikerê. Ma kêfweşî, xemgîn û her hîsê xo bi kurdî ciwîyenê. Polîtîkayê asîmîlasyonî wina aver kewto ke tutê ma wexto ke kewenê karêk bi ziwanêk xerîb qisey kenê. Ma bi ê ziwanî nêbenê xwe. Semedo ke o ziwanêk xerîb o. Nêweşxaneyan de ma nêeşkenê xo bi ziwanê xo qal bikerê.”

 

‘Wa tutî bi hîkayeyê kurdkî pîl bibê’

 

Evîn Kulja wina peynî ard: “Semedo ke ziwan çin nêbo ganî tutî emrê qijî ra kurdkî bimusê. Ganî ewilî dayîka xo ra ziwanê xo bimusê. Verê pîranê ma hîkayeye vatêne. Bi ziwanê ma qal kerdêne. Nika zî ganî bidomnê. Ganî keyeyî tutan dir kurdkî qisey bikerê. Ganî tutî bi hîkayeyê kurdkî pîl bibê. Ganî statuya kurdkî bêro naskerdiş. Ganî tutî bi ziwanê xo perwerde bivînê. Ganî pêşdibistane ra heta zanîngehan perwerde bi ziwanê dayîke bêro dayîş.”