MERKEZÊ XEBERAN – Hemsereka Daîreya Têkiliyê Teberî ya Îdarekarîya Xoserî Îlham Ehmed eşkerayî kerd ke pêvînayîşê ke Şamî dir amebî qebûlkerdiş ke HSD sey 3 tûmenan tewrê artêşe bibo labelê bi mudaxileyê teberî no qerar ame betalkerdiş.

 

Hemsereka Daîreya Têkiliyê Teberî ya Îdarekarîya Xoserîya Demokratîk a Vakur û Rojhelatê Sûrîye derheqê muhtewayê pêvînayîşanê Şamî dir qisey kerd. Îlham Ehmed dîyar kerd ke Şamî destpêk de qebûl kerd ke HSD sey 3 tûmenan tewrê artêşe bibo labelê dimayê “mudaxileyê teberî” no qerar ame betalkerdiş û “tewrbîyayîşê ferdî” ame ferzkerdiş.

 

Îlham Ehmed bale ant ser rolê DYA’yî pêvînayîşan de û va: “Sey mîyançî û garantor, bîyayîşê DYA’yî pêvînayîşan de bi taybetî zî semedê caardişê peymanan semedê ma muhîm o. Semedo ke fikrê ma bimusê û nînan biresnê Şamî, waştî pêvînayîş bikerê. Mîyançîyê înan (Şamî) qebûl kerd ke HSD sey hîrê tûmenan tewr bibo. Demo ke ma Ahmed El Şara dir niştî ro, Amerîka zî amade bî û babeta hîrê tûmenan qebûl kerd. Dima ra na babete ameye vindarnayîş. Ma wina bawer kenê ke mudaxileyêk teberî ame kerdiş û ancî agêrayî babeta tewrbîyayîşê ferdî ser.”

 

Îlham Ehmed ard ziwan ke ganî Cizîr, Hesekê û Kobanê binê îdareyê şarî de bo û va: “Lazim o çarçeweyêk ke rayîr dano şarê herême xo îdare keno esas bêro girewtiş. Şert nîyo ke no tenya kurdan ra pê bêro. Suryan û erebî zî est ê. Ganî kesê bi serran o sazgehê xizmetî de xebitênê û asayîşê zereyî pawenê, îdareyî bidominê.”