Evîn Çîftçî

 

RIHA – Aynûr Yilmaz ke kênaya xo prosesê 2014ine de tewrê YPJ’yî bîye wina va: “Hema DAIŞî nêameyo tîya ma şêrê Rojawan. Ma bi ruhê xoverdayîşê Kobanê newe ra bi ser kewê.”

 

Polîtîkayê DAIŞî yê serra 2014ine yê hemverê Rojawanî bi xoverdayîşê şar veng ame vetiş û no xoverdayîş têkoşînêk bi rûmet ê tarîxî rêça xo verda. 6ê çeleyî ra heta nika HTŞ, DAIŞ û komê paramîlîter ê girêdayeyê Tirkîya hêrişê hemverê Rojawanî de dewam kenê. Şar hemverê nê hêrişan de her çar parçeyî de lingan ser o û bi çalakîyan protesto kenê. Aynûr Yilmaz ke kênaya aye 2014ine de prosesê Kobanê de tewrê Yewîneyê Pawitişê Cinîyan (YPJ) bîye, ajansê ma rê qisey kerd.

 

‘Ma bi ruhê Kobanê newe ra bi ser kewê’

 

Aynûr Yilmaz eşkera kerd ke hema DAIŞî nêameyo ganî şêrê Rojawan û wina va: “Ma bi ruhê xoverdayîşê Kobanê bi ser kewtî. Sey dayîkî kezeba ma veşa labelê wa yê kesê bînan nêveşo. Rojê vîyarte de DAIŞ ame Tirkîya û çar polîsan qetil kerd. Dewlete nê nêzana? Çira piştîdayîş dana? Ez venga dayikê leşker û polîsan kena. Gelo paweyê ke DAIŞîjî bêrê tîya. Hema DAIŞ nêame tîya ma şêrê Rojawan. Ma dest bidê yew û bibê qalxanê gane.”

 

‘Ez nêpawî ez o zî înan dir bimirî’

 

Aynûr Yilmaz behsê kênaya xo ya ke tewrê YPJ’yî bîye kerd û wina dewam kerd: “Kênaya mi prosesê Kobanê de tewr bî. Dimayê ke kênaya mi tewrê YPJ’yî bîye, ma bi telefon qisey kerd. Va ‘dayê dest pêrodayîşê kurd-tirkan vera bidê merdimîye dest ra şina. Sereyê kal û pîran yeno birnayîş. Ez ameya tîya û hemverê DAIŞî têkoşîn kena. Heta destê mi ra bêro ez do bipawî. Nepawî zî ez o bimirî.’ Eke mi biwaştêne mi do bi destê xo sînor parçe bikerdêne û kênaya xo biardêne. Labelê kênaya min va merdimîye destê ma ra şina. Mi semedê şarê kurdî va kênaya mi uca têkoşîn bikere.”

 

‘Çekê dayê DAIŞî do rojêke verê xo bidê înan’

 

Aynûr Yilmaz wina peynî ard: “Rayberê Şarê Kurdî Abdullah Ocalanî 27ê Sibate de veng da û prosesêk da destpêkerdiş. Ma zaf kêfweş bîyî. Labelê ma vînenê ke hem Birêz Ocalanî dir pêvînayîş kenê, hem vanê aştî û heto bîn ra vanê ma kurdan Rojawan ra çin kenê. No sîyasetêk senîn o? Ez nê sîyasetî qebûl nêkena. Eke aştîyêke biba ganî verê DAIŞî de nêvinderê. Hakan Fîdan dest dano DAIŞ. Çeke dano DAIŞî do rojêke verê xo bido înan. Vanê kurd-tirkî wayê-bira yê. Labelê piştîdayîşê DAIŞî kenê.”