MERKEZÊ XEBERAN - Çeteyê hukmatê demkî yê Sûrîye ke piştîdayîşê dewleta tirkan ra gênê, taxanê Şêxmeqsûd, Eşrefîye û Benî Zêd yê Helebî de merdiman remnenê û keyeyê înan talan kenê.

 

Taxê Şêxmeqsûd, Eşrefîye û Benî Zêdî yê Helebî de mabêne 6 û 10ê çeleyî (2025) de bî hedefê hêrişê xidar ê komê çeteyanê girêdayeyê hukmatê demkî yê Sûrîye û dewleta tirkan. Hêrişê ke bi tank, top, teyare û heme tewirê çekê giranî ameyê kerdiş de, qirkerdişî ameyî caardiş, zaf kesî ameyê remnayîş û bi des hezaran kesî koçber bî.

 

Goreyê Ofîsa Koordînasyonê Hetkarîya Merdiman (OCHA) yê NY’yî tewr tay 120,000 kesî taxanê Şêxmeqsûd, Eşrefîye û Benî Zêdî ra koçber bîyî, zêdeyêrî 500 kes zî vînî yê.

 

Semedo ke destûrê derbasbîyayîşê rojnameger û sazgehê heqanê merdiman ê semedê taxan nêyeno dayîş, agahîyê zelal nêameyî bidestkerdiş. Labelê goreyê çimeyê herêmî ke ajansê ANHA’yî rê neql kerd, komê çeteyê bi nameyê Firqeyê Hemze, Firqeyê Emşat, Nûreddîn Zengî, Firqeyê Sultan Murad û ûsn. dimayê qirkerdişî, welatijê taxan de mendê kom kenê, heqaret înan rê kenê û remnenê.

 

Çimeyan neql kerd ke taxa Eşrefîye de hûmarêk roniştoxê kurdî sereştişê keyeyan ke hîna dewam kenê ameyî remnayîş û berdê cayanê nêdîyaran.

 

Goreyê Rêxistina Heqê Merdiman ê Efrînî, çeteyî mîyanê kuçeyan de dest bi talankerdişê keye û milkê roniştixê taxan kerd. Talankerdiş zafê kuçeyê Şêxmeqsûdî, bi taybetî kuçeyê 20ine ê nêzdîyê çatrayîrê Şehîd Kolî, kuçeyê Badîno, kuçeyê 15 û kuçeyê hemverê Ofîsa Îstîxbaratî ya Şekato yenê kerdiş. Ame vatene ke çeteyî yenê dikanan û hemî çîyê zereyî sey mobîlya, hacetê ceyranî û hemî çîyê bînî talan kenê.

 

Pêwa hêriş û talankerdişê komê çeteyan, taxan de problemê ceyran û weşîye zî sewîyeya corîn de yo. Ame neqlkerdiş ke ceyran roje tena 2 saetan yeno dayîş, zafê merkezê weşîye ameyê xirabkerdiş.