Devrîm Findik

 

STENBOL – Cinîyan dîyar kerd ke şorişê Rojawanî şorişê cinîyan o û vatî ke hêrişê HTŞ’yî hemverê Heleb û Rojawanî de hemverê destkewtişê cinîyan o û ganî lezkî no şer peynî bibo.

 

Hêrişê çeteyê HTŞî hemverê taxanê Şêxmeqsûd û Eşrefîye yê Helebî de birojano dewam keno. Qetilkerdişê cinî, tutî û sivîlan û piştdayîşê Tirkîya yê hêrişan, rayîr ver bi reaksîyonê girdî akeno. Hemsereka Partîya Têduştî û Demokrasî (DEM Partî) ya Stenbolî Arîfe Çinar, endama PM’yî ya DEM Partî Gonca Yangoz û verfeka Kongreya Demokratîke ya Şaran (HDK) ya Stenbolî Dîdem Yilmaz derheqê babete de qisey kerdî.

 

‘Rojawan xeta ma ya sûr o’

 

Hemsereka DEM Partî ya Stenbolî Arîfe Çinar da zanayîş ke hêrişê ke ameyê kerdiş hêrişê çeteyan o û va: “Hem hetê SMO’yî de hem zî hetê DAIŞî de nê hêrişî çeteyan yê. Hukmatê demkî zî no organîze keno û nê hêrişan ser o xo bîyaye keno. Labelê eke Tirkîya zî HTŞ’yî rê vajo lazim o ma piştîdayîş bidê, o wext tîya de hemkarî est a û hêrişî semedê SMO’yî yê girêdayeyê Tirkîya yenê kerdiş. Şarê uca şarê tîya yo. Problemo bingehînî DAÎŞ û SMO yo. Ma nê hêrişî şermezar kenê. Rojawan, wîcdanê merdimîye awan keno. Zemînê cuyayîşêko têduşt û azad uca keno cuye. Nê semedî ra Rojawan xeta ma ya sûr o. Hetêk ra behsê aştîye yeno kerdiş heto bîn ra vernîya prosesî yeno girewtiş. Na rewşêka bêmerdimî ya.”

 

‘Hemverê destkewtişê cinîyan hêriş o’

 

Endama PM’yî ya DEM Partî Gonca Yangoz wina va: “Rojawan, şorişêko cinî yo. No hêriş hemverê destkewtişê cinîyan o. Rojawan de sîstemê hemserekî, komunê cinîyan est ê. Nê semedî ra destkewtişê binê hêrişan de yê. Eynî demî de no hêriş hemverê pêro şarê kurdî û destkewtişê şaran o. Şar hemverê hêrişan de xo ver dano. Têkoşînê şarêk uca de est o. Ma kîşte Rojawanî de yê. Ma têkoşînê xo her tim her warî de dewam bikerê. Rewşa uca raste rast tesîr Tirkîya ser o kena. Îqtîdar wazeno destê xo uca xurt bikero Rojawan ra zî dest qezencî ra veranêdano. Ma hemverê nê hêrişan de têkoşînê xo dewam bikerê.”

 

‘Çeteyê HTŞ’yî hêrişê şarî kenê’

 

Hemverfeka HDK’yî ya Stenbolî Dîdem Yilmaz wina fikrê xo ard ziwan: “Ganî hêrişê Heleb û Rojawanî vinderê. Ez hêrişê HTŞ’yî şermezar kena. No prosesî parçe keno. Ameyîne pawitiş ke HTŞ Îdareyê Xoserî yê Rojawanî dir pê bikero. Labelê eksê nê şer dayî destpêkerdiş. Ma bi endîşe yê. Ganî no şer vindero. Çapemenîya terefgire pesnê HTŞ’yî dana. Semedê tesîrkerdişê prosesê aştîye muracatê manîpulasîyonê wina kenê. Wazenê nê awan bikerê ‘behsê prosesê aştîye yeno kerdiş labelê Sûrîye de kurdan dir şer dewam keno.’ Ganî merdimî çapemenîya terefgire ra xo dûr bidê û rastîyan bivînê.”

 

‘Bêbawerî zêde bî’

 

Dîdem Yilmaz bale ant ser muhîmîya reaksîyonê hemverê hêrişan û wina va: “Ma ewro behsê şarê ke kîşte ma de yo kenê. Keyeyê înan uca de yo labelê herra înan nê hetî de est a. Semedo ke Tirkîya piştîdayîşê hêrişan dana no bi bawerîya prosesê çareserîye çin keno. Semedê samimîyetê prosesî ganî Tirkîya piştîdayîşê xo bido het. Şer çîyêk nêdano qezenckerdiş û beno sebebê merdişê sivîlan. Ganî Tirkîya xo hêrişan ra bido kîşte û hemverê şerî de bêveng nêmano.”