Gulîstan Gulmuş

 

RIHA – Kadrîye Dogan da zanayîş ke hêrişê Heleb û bajarê qeraxê Sûrîye tesadufî nîyê û va: “Mifteyê aştîye ya Sûrîye Tirkîya de yo. Tirkîya de çareserî bica nêro nê hêrişî zî do nêvinderê.”

 

Çeteyê HTŞ’yî taxê Eşrefîye û Şêxmeqsûdî yê Helebî de 6ê çeleyî ra hemverê sivîlan de hêriş kenê. Hêrişê ke birojano dewam keno bi desine kesî ameyî qetilkerdiş, bi seyine kesî birîndar bî û zaf sivîlî ameyî remnayîş. Fermandarê Pêroyî yê QSD’yî Mazlum Ebdî eşkerayîye da ke bi hemkarîya hêzê mîyanneteweyî herême de adirbest ameyo îlankerdiş. Labelê pêwa adirbestî çeteyê HTŞ’yî û hêzê girêdayeyê hukmatê Şamî hêrişan dewam kenê. Goreyê agahîyanê herême ra, HTŞ’yî sewqiyatê leşkerî semedê herême zêde kerdo.

 

‘Mifteyê aştîye Tirkîya de yo’

 

Hemsereka Pêroyî ya verî ya Komeleya Elewîyanê Demokratîkan (DAD) û aktîvîsta elewî Kadrîye Dogan dîyar kerd ke hêrişê hemverê elewîyanê Sûrîye zî hetê eynî rêxistinan ra ameyo kerdiş û wina dewam kerd: “Sebebê nê hêrişan, helwestê dewleta tirke xetimnayîşê prosesî yo. Nêzdîbîyayîşê ‘ma hetkarî danê, ma benê destek’ û taloqkerdişê prosesê aştîye yeno dîyayene. Sûrîye de eke aştî bêro caardiş mifteya nê zî Tirkîya de yo. Eynî demî de Tirkîya de eke aştî bêro caardiş mifteyê nê zî Sûrîye yo. Ganî ma bi nê rastî têbigêrê. Tirkîya prosesê aştîye temam bibo do Sûrîye zî demokratîk bibo û nesîbê xo aştîye ra bigîro, biresno aramîye.”

 

‘Prosesêk aştîye ke ganî ma ercnayîş bikerê est o’

 

Kadrîye Dogan dîyar kerd ke modernîteyê kapîtalîst şaranê Rojhelatê Mîyanênî binpay keno û înan yewbînan rê keno dişmin. Ganî destûr semedê nê metodê şerê taybetî nêro dayîş. Semedê cuyayîşêke aştîyane ganî ma xo rêxistin bikerê û waştiş bikerê. Sewbîna rayîrêk bîn çin o. Ganî ma hêz bidê nê prosesî. Eksê nê zîhniyetêko ke cimatî çin keno gird beno. Prosesêk aştîye yo ke ma ercnayîş bikerê est o. Ma mecbûr ê cuyayîşêke hempar, demokrasî û têduştî awan bikerê. Ez hemî hetan dawetê awankerdişê aştîye kena. Ganî her kes tewrê têkoşînê hempar ê ke vernîya qirkerdişan bigîro bibo.”