ŞIRNEX - Dayîkê Aştîye yê ke hemverê hêrişanê çeteyê girêdayeyê Hukmatê Demkî yê Sûrîye taxanê Eşrefîye û Şêxmeqsûd yê Helebî ser o û taxa Benî Zêdî ya suryanîyan ser o reaksîyon mojnayî, vatî ke ê do ver bi Anqara rayîr ra şêrê û wina dîyar kerdî, ê semedê aştîye şênê Anqara.

 

Hêrişê çeteyê girêdayeyê Hukmatê Demkî yê Sûrîye yê taxanê Eşrefîye û Şêxmeqsûdî yê Helebî ke xeylê roniştoxê înan kurd ê û taxa Benî Zêdî ya ke suryanî ci de ciwîyenê, nêzdîyê hewteyêko dewam kenê. Roja yewine ya hêrişan de şarê bajarê Kurdistan û Tirkîya bi eşkerayîya çapemenî û rayîrşîyayîşan reaksîyonê xo ardî ziwan. Çalakîyê ke her beşê cimatî ra kesî tewr benê roj bi roje zêde benê. Endamê Meclîsê Dayîkê Aştîye zî semedê berzkerdişê vengê xo hemverê hêrişan do ver bi Anqara rayîr ra şêrê.

 

Ma Dayîkanê Aştîye dir derheqê hêrişanê taxê Eşrefîye, Şêxmeqsûd û Benî Zêdî ser o qisey kerd.

 

‘Ma do semedê aştîye şêrê Anqara’

 

Hatice Baytur vernî qisey kerd û dîyar kerd ke sey dayîkêke ganî her keso wayîrê wîcdan hemverê hêrişanê Rojawanî ser o bêveng nêmano. Hatice Baytur va, “Eke ewro hêrişê Rojawanî kenê, siba dora ma ya,” û wina dewam kerd, “Ez venga dayîkanê leşker û polîsan kena; çend rojî verê DAIŞî Yalova de tutê înan qetil kerdî. Çira ê hema zî piştdayîşê çeteyê DAIŞî kenê? Ganî heme dayîkî wurzê lingan ser û piştdayîşê waştişê ma yê aştîye bikerê. Rojawan tena nîyo. Eke merdiş lazim bo ma do bimirê, labelê ma hema zî aştî wazenê. Ma heta key vajê ‘aştî’? Ma nika semedê her çî amade yê. Yê ke ewro hemverê hêrişanê Rojawanî ser o bêveng manenê, ne exlaq û ne zî wîcdanê înan est o. Wa her kes destê xo bido yewbînan û vengê xo semedê şarê Rojawanî berz bikero. Kurdî her çar parçeyan de yew ê. Her cayê ke kurdî dej ancenê, ma do pey înan de vinderê. Wa êdî merdimî nêmirê. Çira Hakan Fidan sey kurdêk, şino û piştdayîş dano DAIŞî?”

 

‘Ganî her kes semedê Rojawanî çi destê înan ra yeno bikero’

 

Sewbîna Hatice Durmuş dîyar kerd ke ê êdî kiştiş nêwazenê û her tim aştî û edalet wazenê. Hatice Durmuş ard ziwan ke pêwa waştişê înan ê semedê aştîye, ê her tim bi qetil û zilmî dir rî bi rî mendê û va, “Zerrîya ma şiknayî ya; wa zerrîya tu dayîkêka bîne nêşikîyo. Ma aştî wazenê. Ganî her kes çi destê înan ra yeno semedê derheqê hêrişanê Rojawanî ser o bikero. Ganî her kes nê barî bigîro xo ser. Rojawan de bêedaletî yeno ciwîyayene. Ma hem semedê aştîye hem zî semedê şerî amade yê.”

 

‘Ganî her kes semedê Rojawanî destê xo bido yewbînan’

 

Peynî de Şerîfe Uygur ke ma mîkrofon dergê aye kerd, bi engişta xo polîsê ke Yalova de hetê DAIŞî ra ameyî qetilkerdiş mojna û va, “Tirkîya hema zî piştdayîşê DAIŞî kena. Ê cinî û tutan qetil kenê. Wa nika aştî bêro caardiş û wa êdî tu dayîkî nêbermê. Ma wazenê no zilm peynî bibo. Ganî her kes semedê Rojawanî destê xo bidê yew. Her serre hêrişê şarê uca kenê. Çar parçeyê Kurdistanî yew ê.”