RIHA - Cinîyan cewabê hêrişanê serê Şêxmeqsûd, Eşrefîye û Benî Zêdî de vatî, “Kobanî nêkewt û Eşrefîye zî do nêkewo. Rojawan şorişê cinîyan o û wina do bidomno.”

 

Hêzê girêdayeyê Hukmatê Demkî yê Sûrîye hêrişê xo yê taxê Şêxmeqsûd, Eşrefîye û Benî Zêd ê Helebî ser o dewam kenê. Nê hêrişan de zaf merdimî ameyî qetilkerdiş û zaf merdimî zî birîndar bîyî. Hemverê hêrişanê Helebî ser pêro Kurdistanî şar wuşto lingan ser û waştişê piştîdayîşê Rojawanî kenê.

 

‘Pêro merdimê mi Rojawan de yê’

 

Zahide Yaman dîyar kerd ke zafê merdimê aye Rojawan de yê û va ganî nê şerî peynî bîyarê. Zahide Yaman va, “Ma qet nêwazenê gonî birijîyo. Ma eşkenê sey bira û wayê pîya bicuyê. Pêro merdimê mi Rojawan de yê. Zerrîya ma semedê qirkerdişê uca qewîmîyeno dejena. Wa êdî kes mebermo, êdî bes o. Ma aştî wazenê, ma şer nêwazenê. Ganî hêzê teberî yew bibê û peynîya nê şerî bîyarê.”

 

‘Ganî dinya şîyar bibo û hemverê nê qirkerdişî de wurzo’

 

Aslihan Çiftçî dîyar kerd ke ganî dinya hemverê nê qirkerdişî de bêveng nêmêno û vengdayîşê çalakîye kerd. Aslihan Çiftçî va, “Ganî no şer peynî bibo. Cinî û tutî aşma zimistanî de mîyanê herî û şertê zehmetî yê şerî de dej ancenê; no heyfêko gird o. Ganî şarê ma her cayî ke est o de wurzo; bêrê ma pêro pîya şerî ra vajê vindere. Bi hezaran merdimî zimistan de keyeyê xo yê germî vindî kenê. Ganî dinya şîyar bibo û hemverê nê qirkerdişî de wurzo. Ganî no şer peynî bibo. Ma her tim terefgirê aştîye yê.”

 

‘Kobanî nêkewt û Eşrefîye zî nêkeweno’

 

Fatma Peş dîyar kerd ke Kobanî nêkewt û Eşrefîye zî nêkeweno û va yê ke her tim hetê aştîye de yê do bi ser bikewê. Fatma Peş va, “Eşkerayîya ma ya derheqê hedîseya bîyaye de zelal û qetî yê. Çiqas bedelê înan bibo zî ê nêeşkenê înan bihewênê ke taxê Şêxmeqsûd û Eşrefîye zî bikewê. Ma na babete de zaf zelal ê. Ê ke her tim hetê aştîye de yê do bi ser bikewê. Vengdayîşê mi semedê kesanê ke aştî wazenê no yo ke piştdayîş bidê nê têkoşînî û nê vengdayîşî. Rojawan şorişê cinîyan o û do wina dewam bikero. Ganî kes çîyêk bîn nêfikirîyo.”

 

‘Ez fek vatişê aştîye ra veranêdana’

 

Nebîhe Aslan da zanayîş ke aye çîyê ke Rojawan de qewîmîyenê zaf tesîr bîya û qetî kerd ke ganî şer peynî bibo. Nebîhe Aslan va, “Ez aştî wazena, ez nêwazena şarê ma bimiro. Na gonî do heta key biherikîyo? Eke aştî çin bo çîyêk nêbeno. Heyfê tutanê ma yo, ma rincan bîyê. Dîyayîşê çîyê ke Rojawan de yeno ciwîyayene televîzyonî ser o rewşa ma ya psîkolojîk xira keno. Ez fek vatişê aştîye ra veranêdana. Ganî no şer peynî bibo.”

 

Vengdayîş semedê dewletan: Ma şer nêwazenê

 

Emîne Demîr dîyar kerd ke ê çîyê ke Rojawan de yeno ciwîyayene qebûl nêkenê û bi nê vatişan dewam kerd: “Ma çîyê ke yeno ciwîyayene qebûl nêkenê. Ma venga dewletan kenê ke şer vindarnê. Ma qebûl nêkenê ke nê tutî û merdimî aşma zimistanî de na rewşe de bimanê. Ganî wîcdanê tu kesî nê qebûl nêkero. Homa hetkarîya înan bikero. Ez nêeşkena çîyêk vajî. Ma qet semedê tu kesî şer nêwazenê. Tena waştişa ma aştî ya.”