Gulistan Gulmuş

 

DÎLOK - Merdimê tepiştîyan dîyar kerdî ke veradayîşê tepişteyanê sîyasîyan bi sebebanê keyfîyan taloq benê û wina vatî: “Ma wazenê tutanê xo bivînê. Waştişê ma yê yewine no yo. Ma aştî wazenê. Wa tepişteyî bêrê veradayîş, tutê ma nêmirê.”

 

Zîndanê Tirkîya û Kurdistanî de binpaykerdişê heqan her ke şinê giran û zêdeyêr benê. Veradayîşê tepiştîyan bi sebebanê keyfîyan taloq beno. Ancî pêwa problemê weşîyê giranan, tepiştîyî binpaykerdişê heqan û krîzê aborî dir rî bi rî manenê. Merdimê tepiştîyan ê ke tepişteyê înan şaristananê duran de yê, şîyîş û amayîşî de zehmetîyan ancenê. Semedê feqîrî û krîzê ekonomî keyeyê tepiştîyan bi aşman nêeşkenê şêrê verê tutanê xo.

 

Rayberê Şarê Kurdî Abdullah Ocalanî 27ê Sibate de venga “Aştî û Komelê Demokratîkî” da û bi nê vengdayîşî hêvîya aştîye awan kerd. Prosesê serrêke ke vengdayîş ame kerdiş de waştişê bingehîn ê şarê kurdî est ê. Sere de azadîya Rayberê Şarê Kurdî Abdullah Ocalanî û tepiştîyan o.

 

Qezaya Şehîtkamîlî ya Dîlokî de keyeyê tepiştîyan ê ke tewrê pêvînayîşî bîyê waştiş û prosesî ercnayî.

 

 

‘Ma keyeyê polîs û leşkeran dir aştîye biwazê’

 

Perîşan Akin ke birayê aye Bedrî Akin 17 serrî yo tepişte yo û veradayîşê ey her tim taloq beno dîyar kerde ke birayê aye zîndanê Şirnex, Amed, Dîlok, Bolu û Anqara de mendo. Perîşan Akin wina va: “Bi serran o bi tena serê xo mîyanê odayêk de maneno. Zaf zordarî û bêhuqûqî est ê. Ma keyeyê tepişte û şehîdan wazenê proses baş bidomîyo. Wa tepişteyî bêrê veradayîş. Wa ziwanê ma qedexe nêkerê. Ma aştî wazenê. Wa leşkerî, polîsî û tu kes nêmiro. Heme dayîkî têduşt ê. Wa mebermê. Aştî tena semedê ma nîya, semedê heme şaran a. Wa dayîkê leşker û polîsan kîşte ma de bê, ma pîya şêrê meclîs û aştî biwazê.”

 

Lajê aye 36 serrî yo tepişte yo

 

Hanîfe Çelîk zî dîyar kerde ke lajê aye Abdullah Çelîk 36 serrî yo tepişte yo û aştî wazena. Hanîfe Çelîk nê çîyan ard ziwan:

 

“Lajê mi hetanî nika zaf zîndanan de mendo. Cezaya ey peynî bena, newe ra 3 aşmî taloq kenê. Nika Aksarayî de maneno. Ez wazena vernîya ke ez bimirî lajê xo bivîna. Waştişê ma yê yewine no yo. Wa aştî bêro awankerdiş. Wa tepişteyî bêrê veradayîş. Wa gonî nêrijîyo.”

 

‘Wa tutanê ma vera bidê’

 

Ayniye Orhan ke lajê aye Necmettîn Orhan 36 serrî yo tepişte yo û nika Zîndanê Şakranî de yo zî wina va: “Ma aştî wazenê. Ma serekê xo wazenê. Ma wazenê sey her kesî biciwîyê. Wa tutanê ma vera bidê. Wa ne dayîkê tirkan û ne zî yê kurdan êdî dej nêancê.”

 

‘Ma nêzdîbîyayîşê CHP’yî ra hes nêkerd’

 

Sakîne Behçet zî da zanayîş ke ê hêvîdar ê aştî bêro û wina domnaye: “Ma her tim aştîyêka raşt wazenê. Wa kesî nêxapênê. No demêk prosesê aştîye est o la hema gamêka somut çin a. Heyetêk şi Îmrali. Ma wazenê tepişteyî bêrê veradayîş. Wa şaredarîyanê ma bidê ma. Ma nê nêzdîbîyayîşê CHP’yî ra hes nêkerd. Eke kurdî nêbîyêne, ewro CHP nêresayêne na derece. Ê do hende rayan nêgirewtêne. Ma semedê herra xo zaf têkoşîn kerd. Ma nêeşkenê ziwanê xo înkar bikerê. Ziwanê ma heqê ma yo. Hêvîdar a aştî bêro.”

 

‘Semedê her kesî aştî wazena’

 

Sozdar Akbaş zî semedê birayê xo wina va: “Cezaya mûebetî dayê birayê mi. 5 tutê ey estbî. Ez semedê her kesî aştî wazena. Ez piştîdayîş dana nê prosesî. Her keyeyî de 2-3 tepişteyî est ê. Bêrê ma pîya semedê aştîye têkoşîn bikerê.”

 

Tepişteyê cezaya înan qedîyaya zî nînê veradayîş

 

Xebat Gengeç zî dîyar kerde ke veradayîşê tepişteyê nêweşan taloq beno û wina peynî ard: “Hêvîdar a aştî bêro. Pismamê mi Selîm Hacer 29 serrî yo tepişte yo û nêweş o. Verê cu tîya tepişte bî, nika berdê Kayserî. Dayîka ey bi hesreta ey dinyaya xo bedelnaye. Babîyê ey kal o. Pêwa ke cezaya ey qedîyaya, veranêdanê. Nika felc o. Ma wazenê tepişteyî bêrê veradayîş. Ez wazena ma welat de azad bicîwîyê.”