STENBOL – Cinîyan derheqê, ganî tepişteyê sîyasî bêrê veradayîş de qisey kerdî û vatî ganî komel semedê tepişteyê sîyasî bibê yew. Cinîyan va, tepişteyê sîyasî azad nêbê komel zî azad nêbeno.

 

Prosesê Aştî û Komelê Demokratîkî dir veradayîşê tepişteyê sîyasî ame rojeve. Labelê dewlete hema gamêka somut nêeşta. Zîndanê Tîpê Çalî de tepişteyan semedê binpaykerdişê heqan, grevê merdişî yê bêdemî destpêkerdî û domnenê.

 

Înîsîyatîfê Piştîdayîşê Tepişteyan (TDÎ) Fatma Yildirim, hemsereka Komeleya Hetkarîya Keyeyê Tepişteyan ê Marmarayî (MATUHAYDER) Nurten Karagoz û xala tepişteyê Partîzan Alî Gulmez, Sevîm Kalman derheqê babete de qisey kerd.

 

‘Tepişteyî azad nêbê komel zî azad nêbeno’

 

Înîsîyatîfê Piştîdayîşê Tepişteyan (TDÎ) Fatma Yildirim dîyar kerd ke tepişteyê şorişgirî azad nêbê komel zî azad nêbeno û wina va: “Elîf Vuraltaş teşrîna peyêne 2024 de 30 serrî temam kerd. Veradayîşê bişert ame. Aşma teşrîna peyêne 2024 ra 3 rey bi 6 aşman veradayîş taloq bî. Elîf Vuraltaş zîndanê cinîyan ê Bakirkoyî de manena. Hetê Heyetê Taqîbkerdiş û Îdareyê Zîndanî ra bi keyfî nîna veradayîş. Pêwa nê rewşa tepişteyê nêweşan est a. Tepişteyê nêweşan nêbenê nêweşxaneyan. Berê zî bi kelepçe û leşkeran benê odayan. Derman zî nêkenê û peyser şirawenê zîndan. Semedê nê nêweşî zêde giran bena. Goreyê raporê Heqê Merdiman nêzdîyê hezar û 500 tepişteyê nêweşî est ê. Na hûmare kêmî nîya.”

 

‘Caardişê bêmerdimî’

 

Fatma Yildirim bale ant ser grevê merdişî û zîndanê Tîpê Çalî û wina ard ziwan:

 

“Merdimî ameyî sînorê merdişî. Mîsal Serpîl Cabadan zîndanê Bakirkoyî ra berdî zîndanê Tîpê Syê Manavgatî. A roje ra tenya hucreyê yew kesî de ya. Korîdora ke manena de tu tepişteyêk bîn çin o. Tu kes vengê aye nêşinaweno. Bi di serrî yo na koxuşe de yena tepiştiş. Nîna sewqkerdiş. Zîndanê Tîpê Y’yî de gardîyanan dir zî nêeşkenenê qisey bikerê. Bi megafonan komutan vanê. Ma semedê çareserîya problemê tepişteyan rayîr û metodê çareserî gêrenê.”

 

Wa zîndanê Tîpê Çalî bêrê padayîş

 

Fatma Yildirim dîyar kerd ke rêxistinbîyayîşêk bi nameyê “Wa Zîndanê Tîpê Çalî Bêrê Padayîş!” awan kerdê û wina domna:

 

“Demê bêrê de yeno plankerdiş ke derheqê nê de çalakî û bernameyî bêrê kerdiş. Ma sey TDÎ’yî ci de ca gênê. Semedê çareserîya problemê zîndanan ma xebata xo kenê. Tepişteyê şorişgirî bi têkoşînê ma eşkenê azad bibê. Ê azad nêbê ma zî azad nîyê.”

 

‘Ganî tepişteyê sîyasî bêrê veradayîş’

 

Hemsereka MATUHAYDER’î Nurten Karagoz da zanayîş ke veradayîşê tepişteyê sîyasî samimîyetê prosesê Aştî û Komelê Demokratîkî yo û wina va: “Ma hemverê binpaykerdişê heqan ê zîndanan de çalakî û bernameyê tewir tewir virazenê. Tepişte bêsebeb bi serran o zîndan de girêdaye yê. Ma STK’yî yê. Wezîfeyê ma oyo ke nê bêhuqûqîyan eşkera bikerê, babete bîyarê rojeve û problem çareser bikerê. Ma hewldanê wezîfeyê xo bîyarê ca, goşdarê vengdayîşê aştî û komelê demokratîkî bikerê.”

 

‘Tîp nêmendê’

 

Nurten Karagoz bale ant ser grevê merdişî yê zîndanê Tîpê Çalî û va: “Her tîpî de zîndanî yenê viraştiş. Hema hema tîpî nêmendê. Çira nê merdiman wina tenya verdenê û tecrîd kenê? Nê caardişî qebul nêbenê. Ganî lezkî tepişteyî bêrê veradayîş. Komîsyonê Meclîsî ganî lezkî Abdullah Ocalan dir bêro têhet. Tena bi nê hawayî komel eşkeno razî bibo. Ganî tepişteyî lezkî bêrê veradayîş.”

 

‘Binpaykerdiş û tecrîd dewam keno’

 

Xala tepişteyê Partîzan Alî Gulmez, Sevîm Kalman da zanayîş ke dimayê qirkerdişê 19ê kanûne ra 3 tepişteyê sîyasî koxuşê yewkesî de ameyî bicakerdiş û wina va: “Hemverê tecrîdî de xover danê û hemverê binpaykerdişê bêmerdimî yê. Binpaykerdişê heqan û tecrîd domîyeno. Înfazan veşnenê û veradayîşî taloq benê. Dermanê tepişteyê nêweşan nînê girewtiş û tepişteyî terkê merdişî benê. Ganî rayapêroyî bibo vengê tepişteyê şorişgiran. Înîsîyatîfê “Wa Zîndanê Tîpê Çalî Bêrê Padayîş” wareyêko gird o semedê nê. Ganî heme kesî tîya de bêrê têhet. Ardişê rojeve muhîm o. Tepişteyî binê tecrîdî de yê. Vernîya ma de rayîrêk têkoşînî est o. Ganî ma xo rêxistin bikerê û çalakîyê xo demêk derg plan bikerê.”