Buşra Turan

 

WAN - Hemsereka TUAY-DER’î ya Wanî Rengîn Karaduman da zanayîş ke binpaykerdişê heqan hema dewam keno û wina va: “Ganî tepişteyê nêweşî lezkî bêrê veradayîş. Ganî peynîyê kerdişê keyfî bîyarê û heqê hêvî bêro naskerdiş.”

 

Zîndanê binpaykerdişê heqan bi hawayêko sîstematîk domyeno. Tepişteyî bi xeylêk tewirê şîdet û binpaykerdişê heqan yenê. Heqê tewr sere yê sey weşîye nêeşkenê feyde bigîrê, problemê giranan ê weşîye yenê ciwîyayîş. Goreyê dayeyê TUAY-DER’î merkez û qezayan de 192, Îdir de 41, Colemêrg û qezayanê ci de 181, Mûş de 60, bi pêroyî 4 bajaran de 424 keyeyê tepişteyan est ê.

 

Herêma Serhedî de bi pêroyî 17 zîndanî est ê: Zîndanê Tîpê Tyê Wanî, Tîpê Syê Îdirî, Tîpê Hyê Asayîşê Berzî yê Erziromî, Tîpê Eyê Erziromî, Tîpê Yyê hûmara 1 û 2yîne yê Azîzîye, Asayîşê Berzî yê hûmara 1 û 2yê Dumlu, Colemêrg, Zîndanê Tîpê Tyê Qersî, Zîndanê Tîpê Eyê Muşî, Zîndanê Tîpê Myê Agirî, Zîndanê Tîpê Lyê Agirî, Zîndanê Tîpê Eyê Bedlîsî, Zîndanê Tîpa Tyê Xelatî yê Bedlîsî, Zîndanê Tîpê Tyê Qersî, Zîndanê Tîpê Tyê Ardaxanî, bi pêroyî 17 zîndanî est ê.

 

 11 zîndanê bi kêmî 344 tepişteyê sîyasî est ê.

 

‘Ganî dewlete game bierzo’

 

Rengîn Karaduman dîyar kerd ke ganî dewlete derheqê prosesî de game bierzo û va: “Şarê kurdî çîyê ke kewtê milê înan ser kerd. Qerarê bêçekbîyayîşî ame girewtiş, çekî ameyî veradayîş, hêzê xo antî. Nika ganî dewleta Tirkîya game bierzo. Eke gamê somutî nînê eştiş, fikr û bêbawerî zêde beno. Ganî qetî gamî bêrê eştiş.”

 

‘Ganî tepişteyê nêweşî lezkî bêrê veradayîş’

 

Rengîn Karaduman bale ant zîndanan û dîyar kerd ke ganî tepişteyê nêweşî lezkî bêrê veradayîş û wina va: “Hema zîndanan de qedexe û astengî est ê. Welatêk ke xo sey welatê huqûqî îlan keno de ganî ‘tepişteyê nêweşî’ çinbê. Ganî nêweşî bêrê dermankerdiş. Zîndan de dermankerdiş nêbeno, nêweşî aver şîyenê. Ganî tepişteyê nêweşî lezkî bêrê veradayîş.”

 

‘Ganî heqê hêvî bêro naskerdiş’

 

Rengîn Karaduman eynî wextî de bale ant heqê hêvîye û wina va: “Muebbetê giranan danê tepişteyan, no bi esasî cezaya merdişê bêçeke yo. Pêro cuya merdimî zîndan de girewtiş, huqûqî nîyo. Ganî sere de semedê Rayber Ocalan û heme tepişteyan heqê hêvîye bêro naskerdiş. Tepişteyan rê poşmanî ferz kenê, na maneya wedaritişê îrade û nasnameyê înan a. Bi nê kerdişî nasname û îrade hedef yenê girewtiş.”