MERKEZÊ XEBERAN - Qamişlo de bi hezaran kesî bi waştişê azadîya fîzîkî ya Rayberê Şarê Kurdî Abdullah Ocalanî rayîrşîyayîş organîze kerd.

 

Bajarê Qamişlo yê Vakûr û Rojhelatê Sûrîye de bi hezaran kesî bi waştişê azadîya fîzîkî ya Rayberê Şarê Kurdî Abdullah Ocalanî rayîrşîyayîş organîze kerd. Rêxistinê girseyan ê demokratîkan, temsîlkarê dîn û bawerîyan û bi hezaran welatijan vengdayîşê Meclisê Şarî yê Qamişlo ser o, Çatrayîrê Sonîyî de ameyî têhet. Bi hezaran kesî ke dest bi rayîrşîyayîşî kerdî, xeylêk rey sloganê “Bîjî Serek Apo” berz kerdî û posterê Abdullah Ocalanî wedartî milan ser. Rayîrşîyayîş, mîyanê bajarî de domîya û ji şar û bawerîyê cîyayan ra xeylêk merdiman piştîdayîş da rayîrşîyayîşî.

 

Kongra Star û Alimê Dînî dimayê rayîrşîyayîşî, Çatrayîrê Şehîdan de bi ziwanê kurdkî û erebkî eşkerayîya xo da. Eşkerayîye de tecridê giran ê ke 27 serrî Rayberê Şarê Kurdî Abdullah Ocalan ser o domîyeno ame şermezarkerdiş û ame vatene ke azadîya fîzîkî ya Abdullah Ocalanî do semedê şarê Rojhelata Mîyanîn bibo dîyarker.