MERKEZÊ XEBERAN - Têgêrayîşê Azadîya Cinîyanê Êzidîyan (TAJÊ), Yewîya Cinîyanê Êzidîyan ê Almanyayî, Yewîya Cinîyanê Êzidîyan ê Rojava û Yewîya Cinîyanê Moskov û Ermenîstanî semedê ‘heqê hêvîye’ semedê Rayberê Şarê Kurdî Abdullah Ocalanî bêro nasnayîş Konseya Ewropayî rê mektube şirawitî.

 

Têgêrayîşê Azadîya Cinîyanê Êzidîyan (TAJÊ), Yewîya Cinîyanê Êzidîyan ê Almanyayî (SMJÊ), Yewîya Cinîyanê Êzidîyan ê Rojava û Yewîya Cinîyanê Moskov û Ermenîstanî semedê Rayberê Şarê Kurdî Abdullah Ocalanî heqê hêvîye ra bieşko feyde bigîro û dewleta tirke goreyê qerarê Dadgeha Heqanê Merdiman ê Ewropayî gamê lazimî bierzo, mektube, Konseya Ewropayî ra şirawit.

 

Rêxistin, sazgeh û têgêrayîşê cinîyanê êzidîyan destpêkê mektubî de bale ant prosesê Aştî û Komelê Demokratîkî ser o ke Ocalanî dest pêkerd û dîyar kerd ke semedo ke proses bireso netîce, ganî Ocalan hetê fizîkî ra azad bibo û wina vatî: “Ma sey sazgeh, rêxistin û têgêrayîşê cinîyanê êzidîyan na mektube Konseya Ewropayî rê pêşkêş kenê. Seranserê dinya de şerê zaf giran qewimênê. Bi hezaran merdim, cinî û tutî benê qurbanîyê nê şeran. Nê demê giran ke sey şerê dinya yê hîrêne yeno namekerdiş, berêk semedê çareserî û aştîye abîyo. Tirkîya de prosesê aştî û komelê demokratîkî hetê Rayberê Şarê Kurdî Abdullah Ocalanî ra dest pêkerdo. No proses zî bandorê xo her hetî yê Rojhelatê Mîyanên û dinya ser o keno. Eke no proses bi metodêk serkewte netîce bibo, do zaf hetî û şar nê prosesî ra bi hawayêko pozîtîf ci ra feyde bigîro.”

 

27 serrî yo Rayber Abdullah Ocalan Girawa Îmralî de binê zordarî û tecrîdê giranî de tepişte yo. Rayber Abdullah Ocalan temsîlkarê bi mîlyonan merdîm o ke ma zî sey komelê êzidîyî ey semedê xo rayber û serkêş vînenê. Eynî wextî de zî bi mîlyonan merdim bi fikr û fehmê ey rayîr ra şinê. Ma wazenê dîyar bikerê ke muxatabê çareserîyêk mende Rayber Ocalan o. Bê ey, fikr û ramanê ey aştîyêk mende Rojhelatê Mîyanên û dinya de nêbeno.”

 

‘Dewleta tirke tu gaman nêerzena’

 

Mektube de ame dîyarkerdiş ke Tirkîya de bi hezaran tepişteyî est ê, heme zî heqê hêvîye ra bêpar mendê û nê ercnayîşî kerd: “Dadgeha Heqanê Merdiman ê Ewropayî dîyar kena ke tepişteyêk heta hetayê emrê xo zîndanî de nêeşkeno bêro tepiştiş. Dewleta tirke zî nê qanûnî qebul kena la bi praktîkanê xo pê nêana. Konseya Ewropayî zaf rey semedê Rayber Ocalanî û heme tepişteyan semedê heqê hêvîye dewleta tirke rê veng da ke heqê hêvîye semedê Rayber Ocalanî û heme tepişteyan bêro caardiş, la dewleta tirke na mesela de gaman nêerzena û vurnayîşêk nêkena.”

 

Vengdayîş û waştişê caardişê heqê hêvîye

 

Peynîya mektube de rêxistin, sazgeh û têgêrayîşê cinîyanê êzidîyan qerarê 3ê temmuze 2014ine ard vîrî û vatî, komelê êzidîyî bi taybetî cinîyê êzidî 74 fermanî cuyayê ke fermanê peyênî 3ê temmuze 2014ine de bi û bi xêrê fikr û fehmê Ocalanî fermanê peyênî ra xilas bîyê û bi nê vengdayîşî peynîya mektube ardî: “Ma sey komelê êzidîyî Rayber Ocalanî sey pawitox û xelaskerdoxê xo vînenê. Yê ke komelayêk qirkerdişî ra bixelesno û bipawo, nêeşkeno zîndan de bo. Semedê nê ma waştişê azadîya fizîkî ya Rayberê xo kenê. Ma şima ra zî wazenê heqê hêvîye bêro caardiş. Tepişteyêk heta hetayê binê zordarîyanê giranan de zîndan de nêeşkeno bêro tepiştiş. Ma sey komelê êzidîyî şima ra wazenê ke heqê hêvîye semedê Rayber Ocalanî û heme tepişteyan bêro caardiş. Hema zî qerara heqê hêvîye ke şima hetê Konseya Ewropayî ra 18ê îlonî de girewtî verê çiman de derbaz bikerê û semedê dewleta tirke qerarê şima yê heqê hêvîye pê bêro zordarî bikerê.”