Nazlican Nujîn Yildiz

 

ÎZMÎR - Nazli Atan eşkera kerd ke wazena aştî bibo û keda kesê ke dinyaya xo bedelnayê vînî nêbo. Lajê Nazli Atane Serhat Koyuncu serra 2015ine de dinyaya xo bedelnaye. Nazli Atan va ke lajê ci û bi des hezaran kesê ke nê têkoşînî de dinyaya xo bedelnayê, semedê aştî û azadîye têkoşîn kerdê.

 

Prosesê semedê pêameyîşê aştîye bi serrêk sînor nîyo. Semedê ke aştî pê bêro bi se serrî yo bedelê girdî ameyê dayîş, kedêk pîl ame dayîş. Serhat Koyuncu (Rojhat Agit) YPGyîj serra 2015î de dewa Menacirî ya Serêkaniyê de têkoşînê hemverê DAIŞî de dinyaya xo bedelnaye. Dayîka ey Nazli Atan eşkera kerd ke aye aştîye tewr zaf semedê kesanê ke semedê aştîye kede dayê wazena.

 

Serhat Koyuncu serra 1990ine de Riha de ameyo dinya, hîrê serre de keyeyê ci koçê Manîsayî kerd. Keye semedê zordarîya dewlete koçê Manîsa kerd û 7 serran dewêk Manîsa de ciwîya. Dimayê ke babîyê ci zîndan ra vejîya, semedê wendişê tutan barê Îzmîrî kerdî. Serhatî dibistana sereyîn, mîyanên û lîse Îzmîrî de qedênaye. Semedê zanîngehe şi Aydinî la dima ra reyna kewt îmtîhan û şi Erzirom. Nê prosesî de xebatanê BDPyî de ca girewt. Serra 2014ine de tewrê PKKyî bi. Serra 201ine de têkoşînê hemverê DAIŞî de birîndar bi û semedê dermankerdişî ardî Tirkîya û Nêweşxaneyê Koruyî yê Anqarayî de dinyaya xo bedelnaye.

 

‘Hem semedê xo û hem zî semedê şarê xo têkoşîn kerd’

 

Dayîka ci Nazli Atan eşkera kerd ke lajê aye hem semedê xo û hem şarê xo têkoşîn kerd û wina va: “Lajê mi Aydin de wend la waşt ke şêro Erzirom. Va ez şina uca. Ma va uca serd o, dûr o, meşo. O zî va wendekarê kurdî uca de binê zilmî de yê, ez şina uca. Şi, tewrê xebatanê ciwanan bi. Tewrê xebatanê partîye bi. Hem xebityayîne û hem dibistane wend. Serhatî têkoşîn kerd. Xebate kerd. Weçînayîşan de hîrê qeza girewtî. Keda Serhatî xeylê girde bî. Serhat 22ê adara 2014ine de şi.”

 

‘Dil dixwaze here cengê dayê, keleşa min bîne’

 

Nazli Atan dîyar kerd ke dimayê ke lajê aye tewrê PKK’yî bîyo şîya Erzirom û wina dewam kerd: “Hevalê ci vatî, Serhat tîya xeylê xebitya, kedêk girde da, têkoşîn kerd. Serhat verê ke şêro qerarêk girewtib. Ez hemverê nê qerarî de xeylê bermaya. Mabêne mi û lajê mi xeylê weş bî. Wexto ke ameyêne keye vatêne, ‘dil dixwaze here cengê dayê, keleşa min bîne’. Timûtim na deyîre vatêne. Hemverê her kesî de rêzdar bî. Bi kede, hişyarî û fikranê xo merdimêk bedew bi.”

 

‘Hevalê ey yê birîndar estbî, waştêne vernî de ê baş bibê’

 

Nazli Atan va ke dimayê ke lajê aye şîyo Rojava, ê zî şîyê Rojava û wina va: “Serêkaniye de xeylê kesî birîndar bibî û sewqê Qamişloyî kerdêne. Keyeyê apê mi zî uca bî. Lajê apê mi zî cayê birîndaran de ameyîne dermankerdiş. Ey uca de dibî. Vatibi, keye ameyo wazeno to bivîno. O zî vatibi wa mi wina birîndar nêvînê. Roja peyêne ma tewrê cenazeyê hevalêk şehîdî bibî. Lajê apê mi va, Serhat birîndar o. Dinya serê sereyê mi de rijîya. Ma serê sibayî şî cayê dermankerdişî. Ez şîya, mi lajê xo dî, mi maçî kerd. Ma sohbet kerd. Hevalê ci yê birîndar estbî, waştêne vernê de ê baş bibê. Serhat birîndar bibi. Nêeşkayîne wurzo rûşo. Doktorî va eke îmkanê şima est ê, berê Tirkîya, tîya îmkanî zaf nîyê. La berdişê Tirkîya zî bi rîsk bi. Alternatîfêk estbî. Ma berd Hewlêr. Tîya 15 rojan nêweşxane de mend. O wext rewşa ey baş bî. Dima ra xirab bî. Nê semedî ra ma ard Tirkîya. Tîya de têkoşînê ciwîyayîşî da. Dimayê emelîyatî vatî baş o la şehîd kewt.”

 

Nazli Atan bale ant prosesê aştîye ser o û va no proses bi têkoşînê kesanê ke dinyaya xo bedelnayî dest pêkerdo û va: “Nê semedî ra ma aştîye wazenê. Lajê mi û bi deshezaran kesê ke nê têkoşînî de dinyaya xo bedelnayê, semedê aştî û azadîye têkoşîn kerdî. Gonîya ke rijîyaya wa manaya xo vînî nêkero. Tutê ma şîyê. Kezeba ma veşaya. Wa yê dayîkanê bînan nêveşo. Wa serekê ma azad bibo. Ma azadîya serekê xo wazenê.”