MERKEZÊ XEBERAN - Komîteya Ekonomî ya Kongra Starî akerdişê Kooperatîfê firina Zirganî dîyarî ê cinîyê ke 6 serrî yo Zirganî de xo ver danê, kerd.

 

Komîteya Ekonomî ya Kongra Starî ya Til Temirî, 4 aşmî verî, yanî temmuze de semedê cinîyanê Zirganî dest bi projeyêk kerd. Proje kooperatîfê firina Zirganî ra pê yeno. Dimayê xebatê 4 aşman, firinêke ke hîrê cinî ci de ca girewtî û nanê sîyahî û menaqîşî ke bi her tewirê xo virazîyenê, ame akerdiş. No proje yewin rey Zirganî de û bi îdareyê cinîyan ame akerdiş.

 

Akerdiş de Îdarekara Kongra Starî ya bajarê Zirganî Îsra Hemîd qisey kerd. Îsra Hemîd akerdişê firina Zirganî ke sey projeyê yewine yê semedê cinîyan ame akerdiş, pîroz kerd û va: “Akerdişê firinêke semedê piştdayîşê cinîyan warê ekonomî û manewî de gamêka vernî ya. Cinîyê Zirganî şert û mercanê bêemniyetî, miyanê bombavaranî û koçberîye de mendê la xo ver danê. Bi na game û bi na bawerîye projeyê yewine yê semedê cinîyan ame akerdiş, mojneno ke cinî eşkenê projeyanê tewr pîlan îdare bikerê.”

 

Bi sloganê “Jin Jiyan Azadî” û miyanê atmosferêk bi kelecan de cinîyan rîban birna û dest bi viraştişê nan û menaqîşan kerd û cinîyan rê vila kerdî. Atmosferê akerdişê firine û îdareyê ci zerrîya cinîyan de hêvîyêka neweyî viraşt.