WAN - Raporê ATK’yî de derheqê Rojîn Kabaîşî de cayê vajînalî de DNAyê mêrdan ame tespîtkerdiş. Avûkatanê dosya ra Fatma Ulgen wina va: “No serrêk o ma waştişê na agahî kenê. Çira na agahî teberê hende waştişî de ewro kerdî sey rapor? Wextê ke şî belkî sûcdar remayî û delîlî ameyî tarîkerdiş.”

 

Cenazeya Rojîn Kabaîşe, wendekara serra yewine ya Beşê Averşîyayîşê Tutan Zanîngeha Yuzuncu Yilê Wanî, 27ê êlule 2024ine de wargehê xo ra vejîya û vînî bî, 15ê teşrîna verênê de qeraxê Molla Kasimî de ameya dîyarkerdiş. Dimayê dîyarkerdişê cenazeya Rojîn Kabaîşe de, raporê Sazgehê Tibê Edlî yê Stenbolî (ATK) va ke “tu delîlê tecawizî nêame dîyarkerdiş”. Nêzdîyê serrêke ra dimayî, 10ê teşrîna verênê de, rapora eynî sazgehî va ke di nimûneyê DNAyê mêrdan cesedê Rojîn Kabaîşe de ameyî vînayîş, yew cayê sîneyî de û yew zî ser cayê vajînalî de. Cayo muhîm mîyanê her di raporî ke hetê eynî sazgehî ra ameyî weşankerdiş, persê neweyî ardî û rastîya ke telefonê Rojîn Kabaîşe hema nêamo cigêrayîş, nuqteyêk balkêş o. Sewbîna, rêxistinê cinîyan û huqûqî û wendekarê zanîngehî, semedê roşnkerdişê qetilkerdişê Rojîn Kabaîşe û eşkerakerdişê sûcdaran, çalakîyê tewir bi tewir ameyî viraştiş.

 

Fatma Ulgen, yew avûkata ke destpêk ra dewaya Rojîn Kabaîşe taqîb kena, semedê ajansê ma qonaxê ke dimayê dewaya raporê ATK’yê 10ê teşrîna verêne de delîlê tecawuzî yê qetilkerdişê Rojîn Kabaîşî de ameyî dîyarkerdiş, ercna.

 

‘Belkî sûcdarî remayî û delîlî zî nimte bê’

 

Fatma Ulgen, derheqê qelsîyê raporê destpêkî yê ATK’yî de qisey kerd û va ke her çiqas rapor de ame vatiş ke sebebê mergê Rojîn Kabaîşe “xeniqnayîş” bi zî, tarîxê mergî nêame dîyarkerdiş. Fatma Ulgen ard vîr ke rapor de DNAyê di mêrdan bedenê Rojîn Kabaîşe ser o ame dîyarkerdiş, la sey gemarîyêk muhtemel ameyo hesibnayîş û va: “Tu tespîtkerdiş nêame kerdiş ke DNAyê nê di mêrdan bedenê Rojîne ser o ça de ameyo dîyarkerdiş. Raporo yewin 1ê teşrîna peyêne 2024î de ame û o wext ra ma persenê ke gelo DNA çayê bedenê Rojîne ser o ameyo dîyarkerdiş. Ewro, ma raporê ATK’yî yê 10ê teşrîna verênê ra musayî ke yew nimûneyê DNAyî cayê sîneyê aye ser o û yew zî cayê vajînalî de ameyo dîyarkerdiş. Ma serrêke yo nê agahî wazenê. Çira na agahî, ke verî dosya de bîya, teberê heme waştişî, ewro ameya neqlkerdiş? Rapor mojneno ke belkî dosya de desteştişêk cinsî bibo. Rastî ke agahîya hende muhîm ke belkî rêça dosya bivurno, heta nê qonaxî dosyaye de nêamî zêdekerdiş, mojneno ke cigêrayîş bi bandor û baş nêameyo kerdiş. Serrêke derbaz bî û ma 10 aşmî yo paweyê nê raporî yê. Belkî sûcdarî remayî û delîlî zî nimte bê.”

 

Çira telefon heta nika nêameyo akerdiş?

 

Fatma Ulgen va ke yeno vatiş ke telefon nîno akerdiş. Fatma Ulgen da zanayîş ke bi akerdişê telefonî belkî agahîyê sûcdaran ser û rêça cigêrayîşî bivurno û va: “Cigêrayîşê mergê Rojîne de, ma dî ke qerarê sînorkerdişî avûkatan û keyeyê Rojîne ser o yeno caardiş. Ma xeylê delîlan nêeşkayî bigîrê. Ma nêeşkenê delîlî ke ma nêgirewtê înan ser o munaqeşe bikerê. Ma heta bidestkerdişê raporê dosya de zî zehmetî ant. Her çiqas resnayîşê delîlan dozgerêk dîyin dir no qonaxî de tay asan bo zî, rastîya ke qerarê sînorkerdişî bi temamî nêame wedaritiş, resayîşê dosya tewr zehmet keno.”

 

Di raporê cîya yê eynî ATK’yî ra

 

Fatma Ulgen va ke înan dimayê raporê peyîn yê ATK’yî waştişê nasnameyê nimûneyê DNA’yî her di gumanbaran kerdê û va: “Ma waştişê xo yê semedê cigêrayîşêk hîra pêwa waştişê xo yê newî pêşkeş kerd. Ma hetê karmendanê ATK’yî ke raporî ame amadekerdiş sûcê gerreyî kerd. Nimûneyê ke wextê otopsîyî de ameyî girewtiş dosya de ca girewtê, la ê nêameyî neqlkerdiş. Serrêke dima ra, 10 aşmî pey waştişê ma, rapor ame dayîş. Raporê yewine yê ATK’yî de ame vatiş, ‘Vajînal de nimûneyê DNAyî nêame dîyarkerdiş,’ la raporê dîyine yê ATK’yî de ame neqlkerdiş ke yew nimûneyê DNAyî cayê vajînalî de ame dîyarkerdiş. Ma qalê raporê cîga yê eynî sazgehî kenê. Ma wazenê qetî bikerê ke tîya de îhmalkarîyêk cidî est o. Rastîya ke eynî sazgeh di raporê nakokî yê ATK’yî pêşkeş keno, persê cidî zî xo dir ardî.”

 

Fatma Ulgen va: “Ma dî ke dewlete ke wezîfeyê xo yê esasî pawitişê heqê cuye ya, dewanê qetilkerdişê cinîyan de polîtîkaya bêcezayî dewam kena. Ma do hemverê nê de têkoşînî xo dewam bikerê.”