MERKEZÊ XEBERAN - Goreyê cigêrayîşo ke hetê JINHAyî ra ame kerdiş, ame dîyarkerdiş ke Rojhelatê Kurdistan û Îranî de aşmêke de 17 cinî û 8 tutî ameyî qetilkerdiş, 13 cinî û 3 tutî bi hawayê şik merdî û 7 cinî hetê dewleta Îranî ra ameyî dardekerdiş.

 

Şîdetê hemverê cinîyan bi metodê xo yê cîya, sey yew problemê tewr muhîm ê komelê hemdemî biname beno. Nê metodan de, qetilkerdişê derheqê cinsî û întîxarê cinîyan mînakê tewr wêranker ê. No tena semedê kesan û keyeyan netîceya wêranker nêvirazneno, eynî wextî de tesîrê awanîyê komelî, kulturî û heta ekonomî zî keno. Cigêrayîşê nê herdi dîyardeyan mojneno ke bêtêduştîyê cinsî yê komelî, zordarîyê kulturî û komelî, şîdetê keyeyî, nêbîyayîşê pawitişê qanûnî û mekanîzmayê destekî ke qels ê, sebebê zeîfîyê cinîyan o.

 

Ajansê Cinîyan ê JINHAyî dîyar kerd ke înan her aşme, derheqê cînayet û îdîayê întîxarê cinîyan û sebebê nê de raporêk îstatîstîkî amade kenê. Çarçewaya nê raporî de, aşma êlule de 17 cinî û 8 tutî ameyî qetilkerdiş, 13 cinî û 3 tutî zî bi hawayêko bi şik merdî û 7 cinî ke bi sûcê cîyayî zîndanî de yenê muhakemekerdiş hetê Îranî ra ameyî dardekerdiş.