ANQARA - Roniştişê dewaya Wekîla HDPyî ya verî Semra Guzele de qerarê dewamkerdişê rewşa tepiştişî ame dayîş.

 

Roniştişê dewaya Wekîla HDPyî ya verî Semra Guzele ke sebebê fotografê xo yê endamêk PKK’yî dir bi îdîaya “endamîya rêxistine” yena muhakemekerdiş, Dadgeha Cezaya Giran ya 22ine ya Anqara de ame kerdiş. Semra Guzele zîndanê ke yena tepişnayîş bi rayîrê SEGBÎSî tewrê roniştişî bî. Hemsereka HDK’yî Meral Daniş Beştaş, Verfeka Meclîsa Cinîyan a DEM Partî Halîde Turkoglû û wekîla DEM Partî Saliha Aydenîz û Ayten Kordu zî roniştiş taqîb kerdî.

 

Dozgerî mutalaa pêşkêş kerd û bi îdîayê “şikê remayîşî” waşt rewşa tepiştişî dewam bikero. Semra Guzele zî hemverê mutalaayî de pawitişê xo kerd û va ke pêwa prosesê komkerdişê delîlan temam bîyê zî mutalaayê de tu vurnayîş çin o. Semra Guzele va ke 4 serrî yo muhakeme bena û eger sûcê ke yeno îdîakerdiş cezaya bigîro zî sebebê wextê tepiştişê xo lazim o ke bêro veradayîş û waştişê azadîya xo kerd.

 

Semra Guzele va ke wextê dewayî de sebebê fotografê ke çapemenî ser o ameyê vilakerdiş, propagandayêk sîya ameyo kerdiş û va: “Ma vatibi ke nê fotografî senî ameyê antiş û çara ameyê. Prosesê çareserîya 2013-2015ine de ameyî antiş û o wext qalê qanûnê agêrayîşî ameyîne kerdiş. Keyeyî zî vatêne ‘eger tutê ma agêrê o wext çi zirar est o ke ma înan dir pêvînayîş bikerê.’ Û ameyîş û şîyayîş virazîya û xebera dewlete zî nê şîyîş û ameyîşan ra estbî. Dimayê temamkerdişê prosesî zî nê fotografî ameyî muhakemekerdiş. Dewaya Kobanî de zî ame qiseykerdiş la dadgehe fotografan ser o beraet da. Nika zî prosesêk wina est o. Şar merasîmê çekveradayîşî temaşe kerd, dîmenî ameyî antiş. Gelo eger no proses pozîtîf peynî nêbo qey do ê zî bêrê muhakemekerdiş?”

 

Avûkat Eylem Arzu Kayaoglû zî va ke na dewa dimayê tehdîdê kiştişî yê Wezîrê Karê zereyî ê wextî Suleyman Soylu ameya akerdiş û açaryaya dewaya hesabperskerdişê sîyasî. Eylem Arzu Kayaoglû va ke tu delîlê somutî çin ê, îfadeyê şahîdan pê nêgînê, muwekila aye 37 aşmî yo tepişte ya û lazim o nika bêro azadkerdiş.

 

Avûkat Senem Doganoglû zî dîyar kerd ke wexto ke ewnîyenê delîlan ra tu çîyê somutî werte da çin ê û waştişê azadîya muwekila xo kerd.

 

Dadgehe qerarê dewamkerdişê rewşa tepiştişî da, temamê waştişê avûkatan red kerd û roniştiş 3ê teşrîna peyêne rê taloq kerd.