Oznur Deger - Neslîhan Kardaş 

 

WAN - Endamê Partîya Die Linke ya Almanya, derheqê prosesê “Aştî û Komelê Demokratîkî” de ercnayîş kerd û va: “Têgêrayîşê Azadîya Kurdî gama zaf girde eşt. Nika, averşîyayîşê prosesê aştîye girêdayeyê gamê ke Tirkîya erzena ya.”

 

Vengdayîşê Rayberê Şarê Kurdî Abdullah Ocalanî yê “Aştî û Komelê Demokratîkî” 27ê Sibate de seranserê Tirkîya, Kurdistan û Rojhelatê Mîyanênî de veng da û Ewropa de zî bale ant. No vengdayîşo ke hêvîya aştî û demokrasî Rojhelatê Mîyanênî de xurt kena, hîna zêde yena qebûlkerdiş û şarî zî semedê aştîya dinya bi hêvî yê. Na çarçewa de, kampanyayê dinya yê semedê azadîya Abdullah Ocalanî dewam kenê û her çiqas proseso newe dest pêkerd, kesayetê namdaran ê çar hetê dinya ra piştgîrîya kampanya “Ez wazena Abdullah Ocalanî dir pêvînayîş bikerî” danê.

 

Endamê Partiya Die Linke (Partiya Çepgiran) ya Almanya, bi gêrayîşê di aşman ê Kurdistanî de prosesê aştîye taqîb kerd. Na çarçewa de, heyetê Almanî xeylêk bajarê Kurdistanî, sey Amed, Mêrdîn, Wan û Colemêrg, ziyaret kerdî. Heyet, çimdarî û ercnayîşê xo semedê ajansê ma ard ziwan.

 

‘Prosesê aştîye semedê temamkerdişê şerî yê dinya zaf muhîm o’

 

Endama Die Linke Sarah Schnitzler dîyar kerd ke heyetêk Partiya Die Linke ya Alman panc bajarê cîyayî yê Kurdistanî ziyaret kerdî. Schnitzler va ke înan Partiya Têduştî û Demokrasî (DEM Partî), sendîka û xeylêk sazgeh û rêxistinan dir kom bî û wina va: “Sey çepgirê Almanan, ma xo berpirsiyar vînenê ke piştgîrîya prosesê aştîye bidê. Dewleta ma, hukmatê ma bi serran o serê Kurdistan, Tirkîya û Şarê Kurdî zilm keno. Ma wazenê vengê cîyayîyan semedê têhetbîyayîşê enternasyonalî û aştîya enternasyonalî bêro şinawitiş û ma wazenê ke nê vengî bêrê şinawitiş. Ma zî hukmatê xo ra wazenê ke hêz û dîplomasîya xo bişuxilno. Ma wazenê ke hukmatê ma semedê aştîye zextê hukmatê Tirkîya bikero. Ma wazenê ke temamê bazirganîya çekan bivindero. Her wext ma wazenê ke zilm û zordarîya Tirkîya û Almanya serê multecîyan de peynî bibo. Prosesê aştîye semedê temamkerdişê şerî yê Rojhelatê Mîyanênî bi taybetî û dinya bi pêroyî prosesêk zaf muhîm o.”

 

“Ma pîlbîyayîşê têgêrayîşê kurdan dî”

 

Sarah Schnitzler çimdarîya xo yê Kurdistanî qal kerd û wina dewam kerd: “Par ma ameyî na yera ke weçînayîşan taqîb bikerê. Pêwa pêro zordarîyan, DEM Partî weçînayîşê şaredarîyan de zafêrê vengî girewt. No ma rê mojneno ke têgêrayîşê Kurdî çiqas gird o. Labelê, serra pey, şaredarîyê DEM Partî rê qayimî ameyî tayînkerdiş. Ma dî ke merdim çiqas rincan bîyê. Ê qezenc kenê û dima zî winî kenê. Xeylêk kesê ke ma înan dir qisey kerd, ma ra vatî ke komeleyê sîyasî ameyî girewtiş. Mîsal, Colemêrg de verê 43 komeleyî estbîy, nika tenê panc mendê. Her çend prosesê aştîyê vera dewlete ra ameyî çinkerdiş zî ma vinenê ke merdimî hîna zî semedê gamê girde hêvîdar ê. Ma xeylêk rêxistinan dir qisey kerd û dî ke ê wazenê ma dir qisey bikerê. Ma bawer kenê ke têhetbîyayîşê enternasyonalî zaf muhîm o, çunke ma vengê înan vînenê û vengê înan berz beno. Ma do reyna bêrê înan bivînê û ma zaf bikeyf ê ke tîya yê.”

 

‘Têgêrayîşê Azadîya Kurdî gama zaf girde eşte’

 

Endama Die Linke Mino Soleimani dîyar kerd ke vengdayîşê Abdullah Ocalanî yê semedê eştîşê çekan zaf muhîm û tarîxî yo û qetî kerd ke no vengdayîş çiqas semedê şaranê ke Kurdistanî de cuyênê muhîm o. Mino Soleimani va ke şer bi desan serran o Kurdistanî de dewam keno û wina va: “Netîceyê nê şerî de xeylêk kesî merdî û xeylê înan zindanan de yê. Lazim o ke na rewşe nika peynî bibo. Prosesê aştîye tena semedê kurdan nê la semedê şarê Tirkîya, Kurdistan û temamê dinya muhîm o. Têgêrayîşê Azadîya Kurdî Tirkîya de gama zaf girde eşt. Nika, averşîyayîşê prosesê aştîye girêdayeyê gamê ke Tirkîya erzene ya. Ma veng danê temamê enternasyonalîstan ke piştgîrîya Têgêrayîşê Azadîya Kurdistanî û prosesê aştîye bikerê. Wexto ke Kurdistan azad bibo, ma zî eşkenê azad bibê.”

 

‘Lazim o Tirkîya îşxalkerdişê xo peynî bikero’

 

Tewr peyîn de, endama Die Linke Eva Maibergev qetî kerd ke lazim o hukmatê Tirkîya goreyê berjewendîyê Kurdistanî û Şarê Kurdî hereket bikero. Eva Maibergev va ke prosesê aştîye nêeşkeno yewhetî ra rayîr bibo û dîyar kerd ke azadîya temamê tepişteyan, bi taybetî Abdullah Ocalanî, ferz o. Eva Maibergev piştgîrîya xo semedê kampanya “Ez wazena Abdullah Ocalanî dir pêvînayîş bikerî” ard ziwan û va: “Lazim o Tirkîya îşxalkerdişê xo yê Kurdistanî ser o peynî bikero û azadîya temamê şaranê Tirkîya qetî bikero ke bi ziwan û kulturê xo bicîwîyê.”