Pelşin Çetinkaya

 

AMED - Xebatkara Komeleya Sînemaya Rojhelatê Mîyanên Sîdar Aslan derheqê 9ine Festîvala Belgefîlman ê FîlmAmed de qisey kerd û va: "Festîvala ke pê yena muhîm a. Semedo ke sînemagerî îmkanê ke fîlmanê xo bimojnê bidest kenê. Heqê cinîyan, heqê têduştî, binpaykerdişan kenê babete. Fîlmî mesajê bimana danê.” 

 

9ine Festîvala Belgefîlman ê FîlmAmed ke bi hemkarîya Akademîya Sînemaya Rojhelatê Mîyanên û Şaredarîya Peyasî ra yena organîzekerdiş, do mabêne 26-30ê êlule de vejîyo vernîya temaşekeran. FîlmAmed emser bi babeta "Kokî... Dorê adirî de rastiyê efsûnî" yeno organîzekerdiş. Mojnayîşê fîlman, Salona Sînema ya ÇandAmedî, Salona Tîyatroyê Bajarî yê Amedî û Salona Sînema ya Bezgîn Bekîr de do bêrê mojnayîş. FîlmAmed ke yew bernameyê belgefîlman ê tewr muhîm yê herême yo, destek dano fîlmanê sînemageranê xoser û amanc keno ke belgefîlmê xoser û rexnegirewte biresê girseyê hîra.

 

Xebatkara Komeleya Sînemaya Rojhelatê Mîyanên Sîdar Aslan derheqê 9ine Festîvala Belgefîlman ê FîlmAmedî de qisey kerd.

 

Fîlm xeylêk probleman esas gêno û qal keno

 

Sîdar Aslan dîyar kerd ke fîlmî xeylê bimana yê û va: “Emser bi hemkarîya Şaredarîya Peyasî û Komeleya Sînema ya Rojhelatê Mîyanên festîvale do pê bêro. Emser hetê zêdebîyayîşê salon û pîlîya înan de îmkanê ma est ê. Festîvala ke bena, muhîm a. Semedo ke sînemagerî îmkanê ke fîlmê xo bimojnê bidest kenê. No fîlm babetê komelî esas gênê û qal

kenê. Heqê cinîyan, heqê têduştî, binpaykerdişan kenê babete. Fîlmî mesajê manayîn danê.”

 

Do destekdayîş semedê projeyan bêro dayîş

 

Sîdar Aslan dîyar kerd ke do 29 fîlmî festîvale de ca bigîrê û va: “Ma ewnîyenê fîlman ra rejîsorê cinî zêde yê. Eynî wextî de 3 hebî yê tematîk yew zî yê juriyê şarî do dîyar bikero û xelate bido. Eynî wextî se 7 projeyî ameyî weçînayîş û mîyanê înan de semedê hîrê projeyê fîlman do destek bêro dayîş. Do wayîrê projeyan festîvale de qalê projeyan bikerê û jurî zî mîyan de 7 projeyan ra hîrê heban weçînê.”

 

Do atolye û panelî pê bêrê

 

Sîdar Aslan tewr peyîn wina va: “Vernîya festîvale zî di atolyeyê ma est ê. Festîvale dir eynî wextî de di  panel û di atolye do pê bêrê. Salonê Tîyaytroyê Bajarî yê Amedî, yê Bezgîn Bekîr û yê Şaredarîya Baglarî do fîlman rê wayîrîye bikerê. Cayê ma yo esas zî Merkezê Kongreya ÇandAmedî de yo. 30ê êlule de bernameyê padayîşî est o. Dima ra zî do xelatî bêrê eşkerakerdiş. Mabêne 26-30ê êlule de festîvala ma pê yena û ma pêro şarê xo dawet kenê. Fîlmê manayîn û muhîm est ê.”