MERKEZÊ XEBERAN - Heyetê Cinîyan ê Rojawanê Kurdistanî ke Ewropa de pêvînayîş keno, Almanya de bi xeylêk rêxistinê cinîyan û akademîsyenê Kurdan, Îran û Almanan dir niştî ro.

 

Kombîyayîş de averşîyayîşê Sûrîye, bi taybetî rewşa rojawanê Kurdistanî, problemê cinîyan û prosesê perwerdeyî herême de ameyî qalkerdiş. Beşdaran her eynî wextî de rewşa 3 zanîngehê rojawanê Kurdistanî qal kerdî. Heyet, bale ant muhîmîya xurtkerdişê têkiliyê akademîk zanîngehê Almanya dir.

 

Heyet, pêvînayîşêk bîn bi rêxistina Terre des Femmes (TDF) dir organîze kerd ke pîlêr rêxistina heqê cinîyan ê Almanya ya. Pêvînayîş de, rewşa cinîyan ê Sûrîye ame qalkerdiş.

 

Heyet, îdareya Meclisê Cinîyan ê Vakur û Rojhelatê Sûrîye Emîna Omer, verfeka Meclîsê Cinîyan ê Sûrîye Muna El Hûsif, verfeka Kombîyayîşê Cinîyan ê Zenûbîya Şehrezad El Casim, endama Komîteya Koordînasyonê Kongra Starî Jiyan Hisên û sereka Yewîya Cinîyanê Suryan Corcêt Bersûm, pê yeno.