Rabîa Onver

 

COLEMÊRG - Dayîkê Aştîye proseso ke bi vengdayîşê Rayberê Şarê Kurdî Abdullah Ocalanî ameyo destpêkerdiş ercna û va: “Leşkerî hema hêrişê gerîlayan kenê. Dewlete semedê aştîye nê gamî eştê? Wa dewlete êdî gama somutî bierzo. Ganî serekê ma azad bibo. Çimê ma pêrune aştîye de yo. Wa aştî pê bêro û her kes semedê aştîye rolê xo kay bikero.”

 

Rayerê Şarê Kurdî Abdullah Ocalanî 27ê Sibate de vengdayîşê "Aştî û komelê demokratîkî" kerd û no vengdayîş her cayî de veng da. Serê vengdayîşê Abdullah Ocalanî, PKK’yî 5-7ê Gulane de kongreya xo pê ard û qerarê feshî da. Dimayê nê komêk gerîla yê 30 kesî pê ameyîne 11ê Temmuze de bajarê Silêmanîye yê Başurê Kurdistanî merasîmê veşnayîşê çekan pê ard. Tewr peyîn zî meclîs de komîsyonêk ame awankerdiş.

 

Pêwa vengdayîşê hema şert û mercê azadîya Abdullah Ocalanî pê nêameyo. Dayîkê Aştîye Emîne Atak û Gulbeyaz Mihçi derheqê prosesî de qisey kerdî û vatî, ganî dewlete lezkî gaman bierzo.

 

‘Koyanê Kurdistanî bombavaran kenê’

 

Dayîka aştîye Emîne Atak dîyar kerd ke kênayê aye bi serran o hem PKK’yî de û hem zî zîndan de hemverê zextan xo ver danê û va: “27ê Sibate de proses ameyo destpêkerdiş yew het dewam keno. Bawerîya ma bi dewlete nêmenda. Ma semedê gaman amade yê. La hema dewleta tirkan game nêeşta. Semedê dewlete game nêeşta ma bawer nêkenê. Hêrişî hema dewam kenê. Koyê Kurdistanî yenê bombavarankerdiş. Çimê pêro kesî dewlete de yo.”

 

‘Serekê ma gamêke eşt la dewlete çîyêk nêkerd’

 

Emîne Atak dewam de wina va: “Ganî dewlete lezkî gamanê somutun bierzo. Serekê ma game eşt la dewlete temaşe kena. Çîyêk nêkena. Tutê ma tepişte yê. Ganî dewlete semedê tepişteyan çîyêk bikero. Ma bi partîya xo bi serekê xo bawer ê. La bi dewlete bawer nêkenê. Key gaman bierzo o wext do bawerî zî pê bêro.”

 

‘Ma prosesî ra bawer nêkenê’

 

Dayîka aştîye Gulbeyaz Mihçi zî wina va: “Hêvîya aştîye ma pêro kêfweş kerd. Ez dayîka şehîd, dayîka gerîla û dayîka tepişte ya. Ez aştî wazena. Destek dana aştî. La hema dewlete gamêke nêeşta. Tecrîd dewam keno. Serekê ma azad nîyo. Zextê tepişteyan ser o dewam keno. Proses wina nêbeno. Ganî dewlete gamanê somut bierzo. Şarê kurdî  girêdayeyê PKK’yî û serekê xo yê. Ê çi vajê ma înan esas gênê.”